Almatylyq dárigerler júre almaı qalǵan naýqastyń aıaǵyn 10 sm-ge uzartty

<p>ALMATY. KAZINFORM - Almatylyq dárigerler ózdigimen júre almaı qalǵan naýqasqa jambas býyndaryna endoprotezdeý otasyn jasap shyqty.&nbsp;</p>

Almaty qalalyq qoǵamdyq densaýlyq saqtaý basqarmasynyń málimetinshe, naýqas jambas súıegi aımaǵyndaǵy aýyrsyný, júrip-turýynyń qıyndaýy men bir aıaǵynyń 10 sm-ge qysqa bolýyna baılanysty Ortalyq qalalyq klınıkalyq aýrýhanasyna jatqyzylǵan. 

Ol bul dertpen 10 jyl ýaqyt kúresken. Keıingi 3 jylda naýqas ózdiginen júre almaı qalǵan. Oǵan júrgizilgen tekserý men dárigerlerdiń keńesinen soń aıaq býynyn uzartý men jambas býyndaryna endoprotezdeý otasyn jasaý týraly sheshim qabyldandy.

Tehnıkalyq jaǵynan kúrdeli otany OQKA travmatolog dárigeri Dáýlet Chýkmanov jasady. 

«Biz qajetti kólemdegi endoprotez aldyq jáne jambas býynynyń qalypty anatomııasyn qalpyna keltirý úshin ony ımplantatsııaladyq. Ota barysynda biz jambas býynynyń zaqymdanýyn baıqadyq jáne aıaǵyn 10 sm-ge deıin uzarttyq. Ota sátti aıaqtaldy. Otadan keıin naýqas fızıoterapııa, emdik jattyǵý jáne kúndelikti ómirde qajetti keńespen ońaltý kýrstarynan ótti», - dedi Dáýlet Chýkmanov. 

Kúrdeli ota naýqastyń eki aıaǵyn teńestirýge kómektesti.

Ońaltýdan ótý barysynda naýqas óziniń qozǵalý fýnktsııalaryn qalypqa keltirdi jáne qozǵalys barysynda býyndardaǵy aýyrsyný azaıdy. Aıaqty uzartý sátti ótip, naýqas belsendi ómir saltyna oraldy.

Dárilerdiń sózine sensek, aıaq súıekterin uzartýmen jambas býyndaryn endoprotezdeý osyndaı kúrdeli dıagnoz qoıylǵan naýqastar úshin eń tıimdi emdeý ádisi sanalady. 

«Otanyń sátti nátıjesi naýqastyń otadan keıingi kútimi men dárigerlerdiń bergen keńesin ýaqtyly ári durys oryndaýynda ekenin esten shyǵarmaǵan jón. Ota aýyrsynýdy basý, býyn fýnktsııalary men qysqarǵan aıaqty qalpyna keltirý maqsatynda jasaldy», - dedi Dáýlet Chýkmanov.