Almatyǵa qalyń qar tústi
Almatyda túnde bastalǵan qar toqtaýsyz áli jaýyp jatyr. Qalanyń ishindegi qardyń bıiktigi 14 sm-ge, al taý eteginde 22 sm-ge jetti.
Kommýnaldyq ınfraqurylymdy damytý basqarmasynan málim etkendeı, 1 115 jol jumysshysy men 475 tehnıka qar tazalaýǵa jumyldyryldy.
— Qar jaýa bastaǵan sátten bastap 194 qumsepkish tehnıkanyń kúshimen kóktaıǵaqqa qarsy materıal sebilip jatyr. Tańǵy saǵat 9:00–degi jaǵdaı boıynsha 3 600 tonna materıal paıdalanyldy. Saǵat 4:30–dan bastap jol patrýldik polıtsııa kólikteriniń bastap júrýimen qar kúreıtin 25 tehnıka kolonnasy uıymdastyryldy, — dep habarlady kommýnaldyq ınfraqurylymdy damytý basqarmasy.
Qazir jol jıekterindegi qar úıindilerin shyǵarý jumystary bastaldy.
— 75 shaǵyn tehnıkanyń kómegimen trotýarlar, qoǵamdyq oryndar, áleýmettik mańyzdy nysandar, turaq «qaltalary» tazalanýda. Qoǵamdyq kólik aıaldamalary men jaıaý júrginshiler ótkelderin qolmen tazalaý jumystary da qolǵa alynǵan, — delingen habardamada.
«Qazgıdromet» RMK boljaýynsha, kúndiz aýa temperatýrasy 0…-2 °S, al 12:00–den keıin -5…-7 °S-qa deıin tómendeıdi. Túnde -11…-13 °S bolady. 13 qańtarǵa deıin jaýyn-shashyn bolmaıdy.
Osyǵan baılanysty kommýnaldyq ınfraqurylymdy damytý basqarmasy júrgizýshilerden saqtyq sharalaryn, jyldamdyq rejımin jáne avtomobılder arasyndaǵy qashyqtyqty saqtaýyn suraıdy.
Budan bólek, qar tazalaý tehnıkasynyń jumysyna kedergi keltirmeý úshin jol jıekterine kólik qoımaýdy usyndy.
Osyǵan deıin aýa raıyna baılanysty Almaty halyqaralyq áýejaıynda birqatar reıs keshigip ushatyny týraly jazǵan edik.