Almatyǵa 31 mln-nan astam teńgeniń kontrafaktilik ónimi ákelingen

<p>ALMATY. KAZINFORM &mdash; Almatyda jyl basynan beri 31 223 523 teńgeniń kontrafaktilik ónimi zańsyz aınalymnan alyndy. Bul týraly qalalyq Ádilet departamentiniń zııatkerlik menshik quqyqtary bóliminiń basshysy Erkebulan Jetpisbaev óńirlik kommýnıkatsııalar qyzmetinde ótken baspasóz máslıhatynda aıtty.</p>

Spıkerdiń sózinshi, kontrafaktilik ónimder el ekonomıkasyna zııan keltirip, óndirýshilerdiń kirisin azaıtady.

«Eń ózekti máseleleriniń biri – taýar kóshirmelerimen kúresý jáne onyń belgileriniń quqyqtaryn qorǵaý. Jahandaný jáne kommertsııalyq belsendiliktiń ósýi dáýirinde kontrafaktilik ónim máselesi barǵan saıyn kúrdeli bolyp barady. Saýda belgilerin zańsyz paıdalaný quqyq ıelerine zııan keltirip qana qoımaı, sonymen qatar tutynýshylardyń naryqqa degen senimine nuqsan keltiredi», - dedi Erkebulan Jetpisbaev.

Zııatkerlik menshik quqyqtaryn qorǵaý baǵytynda júrgiligen tekserý nátıjeleri boıynsha 66 quqyq buzýshylyq anyqtaldy.

«Jyl basynan bastap Almaty qalasy Ádilet departamentiniń zııatkerlik menshik quqyqtary bólimi mynadaı nátıjelerge qol jetkizdi: 66 ákimshilik quqyq buzýshylyqtyń jolyn kesip, is qozǵady, onyń barysynda 31 223 523 teńgege 31 978 kontrafaktilik ónim zańsyz aınalymnan alyndy. Joǵaryda kórsetilgen ákimshilik quqyq buzýshylyqtardy qaraý nátıjeleri boıynsha sot quqyq buzýshylarǵa qatysty jalpy somasy 4 750 364 teńgege aıyppul saldy», – dep naqtylady spıker.