Almatydaǵy jer silkinisi men sabaqtyń toqtatylýy kólik qozǵalysyna qalaı áser etti

<p>ASTANA. KAZINFORM &ndash; Sergek sarapshylary Almatydaǵy tabıǵı qubylystar men mektep sabaqtarynyń toqtaýy kólik aǵynyna qalaı áser etkenin zerttedi. Esep negizine jer silkinisi bolǵan tún, 23 qańtarda sabaqtyń toqtatylýy, qalyń qardyń jaýýy jáne qalypty ashyq kúnder alynǵan.</p>

«23 qańtarǵa qaraǵan túni saǵat 00:09-da Almatyda jer asty dúmpýi tirkeldi. Osyǵan oraı, Sergek ITS júıesiniń derekteri qalada kólik qozǵalysynyń kúrt óskenin kórsetti. Qozǵalys belsendiligi shamamen 4,5 esege artyp, túngi 1:00-de sharyqtaý shegine jetip, tek tańǵy saǵat 5-te ǵana qalypty deńgeıge oraldy», - dep habarlady kompanııanyń baspasóz qyzmeti.

Jer silkinisinen keıingi alǵashqy saǵatta qala joldaryndaǵy kólik sany 40%-ǵa artyp, kelesi saǵatta maksımým 208 myń kólikke jetti. Bul ótken aptanyń dál osy ýaqytymen salystyrǵanda 267%-ǵa artyq.

Qaladan shyqqan kólikter sany da 152%-ǵa ósken, eń úlken ósim saǵat 1:00-2:00 aralyǵynda 239%-ǵa jetken.

Sonymen birge, Almatyda 23 qańtarda birinshi aýysymdaǵy oqýshylar úshin sabaqtyń toqtaýyna baılanysty tańerteńgilik kólik qozǵalysy tómendegen. Alaıda, ortasha jyldamdyq 25%-ǵa artqan.

Qar jaýǵan kúnderi Almatydaǵy kóliktiń ortasha jyldamdyǵy saǵatyna 7 shaqyrymǵa deıin tómendeıtini anyqtaldy. Al jyldamdyqtyń maksımaldy tómendeýi tańǵy saǵat 8-de tirkelgen. Salystyrmaly túrde, aspan ashyq kúnderi bul ýaqytta joldaǵy ortasha jyldamdyq saǵatyna 44 shaqyrym bolsa, qar jaýǵanda bul kórsetkish 20%-ǵa deıin tómendeıdi.

Aıta keteıik, Sergek ITS – Sergek apparattyq-baǵdarlamalyq júıelerinen alynatyn «úlken» derekterdi (big data) paıdalanyp, kólik jaǵdaıyn taldaý men modeldeýge múmkindik beredi. Bul ýákiletti organdarǵa kólik aǵyndaryn tıimdirek uıymdastyrýǵa, qalalyq ınfraqurylymdy josparlaý nemese oǵan ózgeris engizgen jaǵdaıda ne bolatynyn esepteýge kómektesedi.