Almatydaǵy Tereńqur saıabaǵynda aǵashtar nege shabyldy — ákimdik jaýap berdi
Megapolıs ákimdiginiń baspasóz qyzmeti Medeý aýdanyna qarasty Tereńqur saıabaǵyndaǵy sý aıdynynyń aınalasynda qaıta jańartý jumystary bastalǵanyn habarlady.
— Saraptamadan ótken joba aıasynda apatty jaǵdaıdaǵy aǵashtardy kesý kózdelgen. Orman-patologııalyq zertteý jumysynyń nátıjesi boıynsha 29 aǵash túp ornymen qazyp alynbaq. Búginde qaıta qurý jumysyn júrgizetin merdiger uıym qýraǵan 2 aǵashty alyp tastady. Merdiger uıym kesilgen aǵashtardyń ornyna ótemaqy retinde 290 túp aǵash otyrǵyzýǵa mindetteldi, — delingen ákimdik jaýabynda.
Sondaı-aq jalpy rekonstrýktsııa aıasynda aýmaǵy keń demalys aımaǵy, serýendeý joly, jaıaý júrginshiler kópiri, amfıteatr, spektaklder sahnasy salynbaq. Oǵan qosa toǵan men rotondy abattandyrý, balalar men sport alańdaryn, oryndyqtar men ýrnalardy, jaryqtandyrý tirekterin jasaý, avtosýarý júıesin tartý qarastyrylǵan. Jospar boıynsha rekonstrýktsııa jyl sońy qaraı aıaqtalady.
Almaty ákimdiginiń baspasóz qyzmeti Tereńqur saıabaǵyndaǵy 3,4 ga jer 20 jyldan astam jeke menshikte bolǵanyn atap ótti.
— Almaty qalasynyń Medeý aýdanyndaǵy Tereńqur saıabaq aımaǵy sý aıdynynyń aınalasyndaǵy jalpy aýdany 3,4 ga ýchaske 20 jyldan astam jeke menshikte boldy. Osy jyldar ishinde atalǵan ýchaskege esh jóndeý júrgizilgen joq. 2023 jyly ýchaske kommýnaldyq menshikke qaıtaryldy. Nysan qala balansyna qaıtarylǵannan keıin rekonstrýktsııalaý boıynsha jobalaý-smetalyq qujattamany (JSQ) ázirleý jumystary bastaldy. Jobalaý jeke qarajat esebinen júzege asyryldy, bul maqsattarǵa bıýdjetten qarajat jumsalmady. JSQ aıasynda barlyq qajetti jobalaý-izdestirý jumystary, onyń ishinde ekologııalyq saraptama júrgizildi, — dep habarlaıdy ákimdikten.