Almatydaǵy temirjol aýrýhanasyn jóndeý jumystary taǵy da shegerildi

<p>ALMATY. KAZINFORM - Almatyda Abaı men Masanshy kósheleriniń qıylysynda burynǵy temir jol aýrýhanasy ornalasqan. Kóp jyldar qaraýsyz qalǵan ǵımarattyń jóndeý jumystary taǵy da uzartyldy.</p>

Almaty qalasynyń ákimi Erbolat Dosaev 2023 jyldyń tamyz aıynda burynǵy temirjol aýrýhanasynyń ǵımaratynda balalardy ońaltýdyń qalalyq ortalyǵy ashylatynyn aıtty. Qala basshysynyń sózinen keıin ǵımarat aýmaǵy qorshalyp, nysan pasporty ilingen bolatyn. Pasport boıynsha jóndeý jumystary 2024 jyldyń mamyrynda bastalyp, 2025 jyldyń jeltoqsan aıynda aıaqtalýy qajet edi.

Alaıda josparlanǵan jumystar ýaqtyly bastalmady. Ol kezde redaktsııa saýalyna qala ákimdigi jobalaý-smetalyq qujattamany ázirleý aıaqtalmaǵanyn aıtyp, jaýap berdi. Sondaı-aq, qurylys jumystary 2024 jyldyń qazan aıyna bastalatynyn habarlady.

Foto: Kazinform / Dosbol Atajan

Degenmen, qazan aıynda terezeleri synyp, qabyrǵasy kógergen ǵımarattyń jóndeý jumystary taǵy da bastalǵan joq. Osy oraıda, Kazinform tilshisi qala ákimshiligine qaıtadan júgindi. Almaty qalasynyń Qurylys basqarmasy bul joly jóndeý jumystarynyń bastalmaýyn nysannyń tabıǵı tozý úlesi artýyna baılanysty ǵımaratqa qaıta tehnıkalyq zertteý jumystary júrgizý qajettigimen túsindirdi.

- 2021 jyly tamyzda Abaı kóshesiniń boıyndaǵy qalalyq balalardy ońaltý ortalyǵy retinde Oqý-klınıkalyq ortalyǵynyń ǵımaratyn qaıta jańartý boıynsha jobalaý-smetalyq qujattama ázirleý bastaldy. 2023 jyldyń qazan aıynda medıtsınalyq jabdyqtar boıynsha klınıkalyq-tehnıkalyq negizdemeniń qorytyndysy alyndy. Búgingi kúni Dárilik zattar men medıtsınalyq buıymdardy saraptaý ulttyq ortalyǵynan tehnıkalyq sıpattamalardy baǵalaý boıynsha qorytyndy alý jumystary júrgizilip jatyr. Sondaı-aq, jobalanyp jatqan nysannyń tabıǵı tozý úlesi artýyna baılanysty ǵımaratqa qaıta tehnıkalyq zertteý jumystaryn júrgizip, onyń nátıjesi boıynsha jobany túzetý jumystary júrip jatyr, - dep habarlady basqarmadan.

Foto: Kazinform / Dosbol Atajan

Sonymen qatar, Qurylys basqarmasy redaktsııa saýalyna jibergen jaýabynda memlekettik saraptamanyń qorytyndysyn alý 2025 jyldyń 1 toqsanyna josparlanǵanyn, al qurylys-montajdaý jumystarynyń bastalý ýaqyty - 2025 jyldyn mamyr aıy ekenin atap ótti.

Eske salaıyq, buǵan deıin Almatyda qaraýsyz qalǵan aýrýhana qashan jóndeletini týraly jazǵanbyz.