Almatydaǵy eń kóne bazar jyl sońyna deıin jańartylady
«Almaty-1» bazary 1938 jyldan bastap jumys isteıdi. Aýdany 7 myń sharshy metr, onda jylytý jáne ınjenerlik jelige qosylmaǵan konteınerlik tıptegi 570 saýda núktesi bar. Ótken ǵasyrdyń 40-50-shi jyldarynda salynǵan bazar ǵımarattary tozǵan jáne qaýipsizdik standartyna sáıkes kelmeıdi.
«Bazardy jańǵyrtý aıasynda saýdagerler men kelýshiler úshin sonyń ishinde tez buzylatyn ónimderdi saqtaýǵa jáne jylýmen qamtamasyz etýge arnalǵan tońazytqysh kameralary úshin qolaıly jaǵdaı jasalady. Sondaı-aq jobada lıftter, eskalatorlar, jer asty jáne jer ústi avtoturaqtar, meıramhana aýlasy, jaıaý júrginshiler aımaǵy jáne taǵy basqasy kózdelgen», - dep atap ótti ákimdikten.
Birinshi korpýstyń birinshi jáne ekinshi qabattarynyń metall qańqasy turǵyzyldy. Eden aralyq beton quıý aıaqtaldy. Qazirgi ýaqytta baspaldaq salynyp jatyr. Avtonomdy gaz qazandyǵyn montajdaý jumystary bastaldy.
Qala ákiminiń tapsyrmasyna sáıkes, saýdagerler konteınerlerden kóshiriletin birinshi korpýstyń qurylysy osy jyldyń sońyna deıin aıaqtalýǵa tıis.
Jalpy, keshenge azyq-túlik jáne kıim-keshek bazarlary, jalǵa alýshylarǵa arnalǵan oıyn alańdary, meıramhanalar, ákimshilik bólim, halyqqa qyzmet kórsetýge arnalǵan basqa da aımaqtar, tıeý-túsirý kireberisteri, jer asty parkıngi kiredi. Jeke ınvestıtsııalardyń jalpy somasy 7,3 mlrd teńgeden asady.
2021 jyly Almatyda «Rahat kz» bazarlary men «Alataý» bazarynyń 4 blogy kúrdeli jóndeýden ótti.
Búginde qalada saýda qyzmetin retteý týraly Zańǵa sáıkes 33 bazar jańǵyrtyldy, taǵy toǵysynda 2025 jylǵa deıin jumys aıaqtalýǵa tıis.
2022 jyldyń aqpanynda Memleket basshysy Qasym-Jomart Toqaev Úkimettiń keńeıtilgen otyrysynda eldegi bazarlardyń jumysyn zańnamalyq turǵydan retteýdi tapsyrǵan bolatyn.
«Saýda-sattyqtaǵy tıimsiz deldaldyqqa toqtaý salatyn kez keldi. Mysaly, 3 mln adam turatyn Almaty qalasy men onyń tóńiregindegi eldi meken turǵyndary tutyný taýarlaryn kóbine «Altyn orda» bazarynan alady. Almaty oblysy men Almaty qalasynyń ákimderine Úkimetpen birlesip, bazarda tártip ornatýdy tapsyramyn. Bul jer paıdakúnemder úshin naǵyz maıshelpekke aınalǵan. Buǵan Alamtydaǵy qańtar oqııǵasy kezinde anyq kóz jetkizdik», -degen edi Memleket basshysy.