Almatydaǵy avtobýs apaty: sottalýshy ózin tek «Buzaqylyq» baby boıynsha kináli dep sanaıdy

<p>ALMATY. KAZINFORM &ndash; Almaty qalasynyń Qylmystyq ister jónindegi mamandandyrylǵan aýdanaralyq sotynda abaısyzda úsh adamnyń ólimine ákelgen buzaqylyq jáne kóliktiń qaýipsiz jumysyn qamtamasyz etý erejelerin buzdy dep aıyptalǵan sottalýshyǵa qatysty qylmystyq is boıynsha kezekti sot otyrysy ótti. Sot otyrysy onlaın-translıatsııa arqyly kórsetildi.</p>

Eske salsaq, ótken sot otyrysynda jábirlenýshi tarap sottalýshy men jaýapkerden materıaldyq jáne moraldyq ótemaqy tóleý jóninde talap qoıǵan bolatyn. Sot barysynda sottalýshy Darhan Ahmetjanov, avtobýs júrgizýshisi Ermek Shókebaeva, «Dýman Trans» JShS ókili bul tarap aryzdy qoldamaıtyndaryn aıtty.

Óz kezeginde «Dýman Trans» JShS ókili 47-shi baǵyttaǵy avtobýsty óndirýshi Samarqand avtokólik zaýytynyń jazbasha jaýabyn usyndy.

«Avtobýstarǵa ornatylǵan beınebaqylaý júıesiniń dybys jazý múmkindigi joq», - delingen zaýyttyń jaýabynda.

Sot otyrysy barysynda sottalýshy men avtobýs júrgizýshisi Shókebaevaǵa naqtylaý suraqtary qoıyldy, olar burynǵy jaýaptaryn qaıtalap aıtyp berdi. Sondaı-aq sot qylmystyq is materıaldaryn zerttedi.

Al sottalýshy Ahmetjanov 293-baptyń 1-bóligi («Buzaqylyq») boıynsha ǵana kinásin moıyndap, adamdardyń ólimine júrgizýshini kinálady. Onyń aıtýynsha, Shókebaeva soqqydan soń esin joǵaltpaǵan.

«Júrgizýshi Ermek Shókebaeva esin joǵaltqan joq. Men ony naqty bilemin. Men ony urǵan kezde ol maǵan ashýlanyp: «Biz qazir soǵylamyz, men saǵan kórsetemin», - dep, meni qorqytý úshin gazdy basty. Oqıǵa bolǵan soń, kólikten shyǵýǵa tyrysqanymda ol: «Ony ustańdar», - dep jatty», - dedi sottalýshy Darhan Ahmetjanov.

Avtobýs apatynda qaıtys bolǵan Aıdos Álmenbaevtyń áıeli Aınur Qusaıynova da avtobýs júrgizýshisin kináli sanaıdy. Ol júrgizýshi qoǵamdyq kóliktegi barlyq jolaýshynyń ómirine jaýapty ekenin aıtty.

Óz kezeginde avtobýs júrgizýshisi Ermek Shókebaeva basqa kólikke soqtyǵysyp, jolaýshydan ósh alý týraly eshqandaı oıy bolmaǵanyn aıtty.

Sýdıa T.Shakırovtiń sheshimimen sot otyrysy 25 sáýirge shegerildi. Bul sot otyrysynda jaryssóz ótetin bolady.

Aıta keteıik, QR Joǵarǵy Soty Almatydaǵy avtobýs apatyna qatysty kezekti sot otyrysyn tikeleı efırde kórsetý týraly sheshim qabyldady. Sol sebepti kezekti sot otyrysynyń onlaın translıatsııasy Joǵarǵy Sottyń YouTube-kanalynda kórsetildi. 

Eske salsaq, ótken jyly jeltoqsan aıynda Almatyda № 47-shi baǵyttaǵy qoǵamdyq kóliktiń ishinde Darhan Ahmetjanov janjal shyǵaryp, júrgizýshi áıeldi urǵan. Saldarynan áıel esinen tanyp, kólikti basqara almaı, aıaldamada turǵan bir top adamdy qaqqan. Apat saldarynan 7 adam zardap shegip, 3 adam qaıtys boldy. 

Osyǵan baılanysty sotttalýshy Darhan Ahmetjanovqa qatysty sot otyrysy bıyl 20 naýryzda bastalǵan edi.