Almatydaǵy avtobýs apaty: sot jalǵasyp jatyr

<p>ALMATY. KAZINFORM &ndash; Almatyda avtobýs júrgizýshisin uryp, úsh adamnyń ólimine sebepker bolǵan jolaýshyǵa qatysty sot otyrysy jalǵasyp jatyr.</p>

Sot otyrysynda jol apaty bolǵan kezdegi avtobýs ishinde túsirilgen beınejazba kórsetildi. Osydan soń sottalýshy men jábirlenýshi tarapqa suraqtar qoıyldy.

Sottalýshy Ahmetjanovtyń advokaty júrgizýshi Ermek Shókebaevaǵa avtobýs ishinde oǵan ne aıtqanyn surady.

«Ol janjal shyǵarǵan soń oǵan „urǵyń kele me, ur“ dedim. Biraq ol olaı jasaıdy dep oılaǵan joqpyn. Negizi aqyl-esi durys adam sekildi. Alǵan soqqydan keıin esimdi joǵalttym, shok jaǵdaıda boldym, ne aıtqanym esimde joq. Soqqydan alǵan jaraqattarym áli bar», - dedi Ermek Shókebaeva.

Jol apaty saldarynan qaza bolǵan Aıdos Álmenbaevtyń jubaıy Shókebaevany kinálady.

«Sen bildiń ǵoı onyń uratynyn. Sol sebepti ony turǵan jerinde qulatam dep gazdy bastyń, saldarynan úsh adamdy qaqtyń», — dedi ol.

Ermek Shókebaeva ózin kináli sanamaıtynyn aıtty.

Prokýror Ahmetjanovqa eger júrgizýshi áıel oǵan dóreki sóılep, ar-namysyna tıse, oǵan qol kóterýdiń ornyna nege zań organyna shaǵymdanbaǵanyn surady.

«Meniń zańnan habarym joq. Ómirimde buryn-sońdy mundaı jaǵdaı bolǵan joq. Men ol kezde balany, úıge tezirek jetýdi oıladym», — dedi Darhan Ahmetjanov.

Ol sondaı-aq Shókebaeva soqqy alǵan soń esin joǵaltpaǵanyn aıtty.

«Ol talyp qalǵan joq. Sebebi, ony soqqan soń, ol maǵan „qazir men saǵan kórsetemin“, taǵy birdeńelerdi aıtty, ol esimde qalǵan joq. Urǵanym úshin ókinemin», — dedi Ahmetjanov.

Onyń aıtýynsha burynda ol shahmatpen aınalysqan, sotty bolmaǵan.

Sot otyrysyna qatysqan Ahmetjanovtyń azamattyq nekedegi áıeli onymen otaý qurǵanyna eki jyl bolǵanyn, Ahmetjanovtyń úsh balasy bar ekenin aıtty.

Aıta keteıik, Darhan Ahmetjanovqa qatysty sot otyrysy osymen tórtinshi márte keıinge shegerildi. Kelesi sot otyrysy 17 sáýirde ótedi.

Eske salsaq, avtobýsta júrgizýshi áıeldi urǵan Darhan Ahmetjanovqa qatysty sot otyrysy 20 naýryzda bastalǵan edi. 

Aıta keteıik, ótken jyly Almatyda №47-shi baǵyttaǵy qoǵamdyq kóliktiń ishinde Darhan Ahmetjanov janjal shyǵaryp, júrgizýshi áıeldi urǵan. Saldarynan áıel esinen tanyp, kólikti basqara almaı, aıaldamada turǵan bir top adamdy qaqqan. 

Apat saldarynan 7 adam zardap shegip, 3 adam qaıtys boldy.