6 jasar Lıza Pylaevanyń jumbaq ólimi: Sot aıyptalýshylardyń bárin aqtady
Naýryzbaı aýdandyq qylmystyq ister jónindegi mamandandyrylǵan aýdanaralyq soty 6 jasar qyzdyń ólimine qatysty isti qarady.
Sýdıanyń aıtýynsha, Elızaveta Pylaevanyń ólimine qatysy bar dep aıyptalǵan naǵashy tátesi Olga Shmakova, naǵashy ájesi Leonarda Ryjakova jáne baǵban Ýktab Mahmýdovtyń qylmysy dáleldengen joq.
Eske sala keteıik, Elızaveta Pylaeva 2019 jyldyń 12 mamyry kúni belgisiz jaǵdaıda qaıtys boldy.
Qyzdyń ákesi Aleksandr Pylaevtyń aıtýynsha, qyzdy 9 mamyrda anasy alyp ketken. 12 mamyrda oǵan burynǵy jubaıy habarlasyp, balanyń aýrýhanada aýyr halde jatqanyn habarlaǵan.
«Qyzym menimen turatyn. 9 mamyrda ony anasy, meniń burynǵy áıelim alyp ketti.12 mamyrda ol maǵan keshke qońyraý shalyp, qyzymnyń aýrýhananyń jansaqtaý bólimine túskenin aıtty. Ol «Lıza eskertkish músinnen qulap qaldy» dedi. Dereý aýrýhanaǵa keldim. Dárigerlerdiń aıtýynsha, qyzym aýrýhanaǵa kelgende óli túsken. Balamnyń omyrtqasy synyp ketken. Denesi jaraqat alǵan. Biraq ústinde bir tamshy qan joq. Tań qalarlyq bolyp kórindi», - degen bolatyn ákesi Aleksandr Pylaev.
Buǵan deıin Prokýrordyń aıyptaý aktisi boıynsha, marqumnyń ata-anasy arasyndaǵy ajyrasý protsesi 2014 jyly bastalǵan, sodan keıin Lızanyń anasy Aleksandr Pylaev qyzdyń bıologııalyq ákesi emes ekenin aıtqan. Keıinnen burynǵy erli-zaıypty bitimgerlik kelisimge kelgen. Nátıjesinde Lıza ákesimen birge turǵan. Al anasy ony demalys jáne mereke kúnderi alyp ketip júrgen. 2019 jyldyń mamyr aıynda da osylaı bolǵan.
Sol ýaqytta Lızany anasy alyp ketken, biraq ózi demalýǵa Almaty oblysyna ketip qalǵan. Sol kezde qyzdy naǵashy ápkesi Olga Shmakova men onyń kúıeýi qarap qalǵan. Shmakovanyń kúıeýi kishkentaı Lızamen ýaqyt ótkizgen. Muny baıqaǵan kúdikti Olga Shmakova ashýlanyp, qyzǵanǵan. Ol kúıeýi qyzdyń ákesi bolýy múmkin dep kúdiktengen. Sosyn kúdikti balalaryn alyp, saýda ortalyǵyna kólikpen barmaq bolǵan.
«Osy kezde kishkentaı Lıza Pylaeva úıden aýlaǵa shyǵyp turǵan. Olga Shmakova óziniń otbasyndaǵy jaǵdaıǵa ashýlanyp, kishkentaı qyzǵa qastandyq oılaǵan. Qylmysty jasaý úshin kólikti qarý retinde paıdalanyp, kámeletke tolmaǵan Elızaveta Pylaevany qaǵyp ketken», – delingen bolatyn aıyptaý aktisinde.