Almatydaǵy 5600 ǵımarat jer silkinisine tózimsiz

<p>ASTANA. KAZINFORM &ndash; 2017-2018 jáne 2023-2024 jyldary júrgizilgen pasporttaý jumystary Almatydaǵy tekserýge tartylǵan 20 myń nysannyń 26 paıyzy jer silkinisine tózimsiz ekenin kórsetken. Bul týraly Almaty qalasyn damytýdyń 2025 jylǵa deıin bes jyldyq josparynyń jobasynda aıtylǵan.</p>

- Jyl saıyn qaladan 80 km radıýsta 200-ge deıin álsiz jer silkinisi bolady. Bul rette, qarqyndylyǵy 2-den 4 balǵa deıingi jer silkinisi Almaty úshin fondyq rejım bolyp esepteledi. Qala aýmaǵynda 27 tektonıkalyq aqaýlar bar. Olardyń 60%-dan astamy taýly aýmaqta ornalasqan, - dep jazylǵan qujatta.

Damý josparyndaǵy derekke sensek, qaladaǵy tekserýden ótken 20 myńnan astam ǵımarattyń 5,6 myńyn jer silkinisine tózimdi etip jóndeý kerek nemese súrip tastaý qajet.

- Qalanyń seısmıkalyq qaýipsizdik deńgeıin baǵalaý úshin Seısmologııalyq baqylaýlar men zertteýlerdiń ulttyq ǵylymı ortalyǵy «Eýrostandart» negizinde seısmıkalyq shaǵyn aýdandastyrý kartasyn ázirledi. Oǵan sáıkes qala 9-10 baldyq seısmıkalyq aımaqta ornalasqan. Jer silkinisine tózimdilik talaptaryna sáıkes kelmeıtin obektiler men ǵımarattardy anyqtaý úshin 2017-2018 jáne 2023-2024 jyldary 20 myńnan astam obektige pasporttaý júrgizildi. Olardyń 26%-y (5,6 myń obekt) seısmıkalyq kúsheıtýdi nemese buzýdy talap etedi, - delingen qujatta.

Buǵan deıin derekterde shahardaǵy jer silkinisine tózimsiz nysandardyń sany 3 myńnyń tóńireginde ekeni aıtylyp kelgen.