Almatyda zorlanǵan egiz qyzdyń 7 jasar ápkesi de birneshe jyl zorlyq kórgen

<p>Bala quqyqtary jónindegi ýákil Dınara Zákıeva Almaty oblysynda aýrýhanada jatqan zorlanǵan 3 jasar qyzdarǵa, sondaı-aq olardyń baýyrlary turyp jatqan Sábıler úıi men Balalar úıine bardy, dep habarlaıdy <a href="https://kaz.inform.kz/search_results/?q=%D0%B7%D0%BE%D1%80%D0%BB%D1%8B%D2%9B" target="_blank" rel="noopener">QazAqparat</a>.</p>

Ýákil bul balalardyń ómiri naǵyz tozaq bolǵanyn aıtty.

«Bul qyzdardyń 7 jasar ápkesine de buryn qorqynyshty qylmys jasalǵan jáne jazasyzdyqtyń, maskúnemdiktiń jáne tolyq degradatsııanyń saldarynan bul qylmys qaıtalanyp otyr. Keshe aýdandyq polıtsııa departamentimen, densaýlyq saqtaý jáne bilim basqarmalarymen buryn bolǵan oqıǵalardyń barlyq tizbegin zerttep shyqtym. Eki jyl buryn egizderdiń anasy men ógeı ákesi 7 jasar qyzynyń jynys múshesin kóseýmen kúıdirgen, bul qyz bala oqyǵan ınternatta anyqtaldy. QR Qylmystyq kodeksiniń 140-baby boıynsha is qozǵalǵan (degenmen bul 110-bap «Azaptaý» bolýy kerek) jáne ata-ana quqyǵynan aıyrý týraly másele qoıylǵan», - dep jazdy Dınara Zákıeva Facebook jelisinde.

Ýákil bul istiń qate bap boıynsha júrgizilgenin (110-baptyń ornyna 140-bap) jáne balanyń ógeı ákesi azaptaýǵa qatyssa da (is materıaldarynda bar), anasy ǵana jazalanǵanyn aıtýda.

«Ekinshiden, sot ata-ana quqyǵynan aıyrý týraly ótinishti qabyldamaǵan jáne aıyppul salǵan. Nátıjesinde bala úıde oqytýǵa aýystyrylǵan jáne bul tozaqta taǵy eki jyl ómir súrgen. Qazir anyqtalǵandaı, olar zorlaý belgilerin jasyrý úshin kúıdirgen. Eger eki jyl buryn kináli jazalanyp, «Azaptaý» baby boıynsha otyrǵyzylsa, úsh balany qutqarýǵa bolar edi. Osyǵan baılanysty, tekserý júrgizip, buzýshylyqtar úshin barlyq jaýapty tulǵalardy jaýapqa tartý qajet dep sanaımyn. Bul úshin barlyq qajetti sharalardy memlekettik organdarmen birge qabyldaımyz», - dedi D. Zákıeva.

Bul jaǵdaı men jalpy statıstıka taǵy bir máseleni kóteredi. Búginde ishki ister mınıstrliginiń málimetinshe, otbasylyq-turmystyq saladaǵy qylmystardyń 70%-y alkogolızmmen jáne áleýmettik jaǵdaıdyń tómendigimen baılanysty.

«Bul qylmystar kún saıyn 342 adamǵa jasalady. Ár sannyń artynda áıeldiń, balanyń ómiri men taǵdyry jatyr. Kóptegen óńirlerde, mysaly, Jetisý oblysynyń keıbir aýyldarynda, Túrkistan oblysynyń 14 aýylynda alkogol satýǵa tyıym salynǵanyn jáne is júzinde qylmys joq ekenin bilemin», - deıdi bala quqyǵy jónindegi ýákil.

Eske sala ketsek, Almaty oblysynda kishkentaı egiz qyzdardy zorlady degen kúdikpen 40 jastaǵy er adam ustaldy.

Qyzdardyń birine operatsııa jasaldy.