Almatyda jylý jelilerin jóndeý úshin 170 túp aǵash kesiledi
Qaıta qurýdyń maqsaty – M-8 qalalyq jylý magıstraliniń fızıkalyq tozýyna baılanysty resýrsyn qalpyna keltirý jáne jumysyn jaqsartý. Bul jylý magıstrali 1991 jyly paıdalanýǵa berilgen.
«Jylý qubyryn aýystyrý 212 kóppáterli turǵyn úıdi, 39 jeke turǵyn úıdi, 2 mektep pen 1 balabaqshany, 1 emhanany jáne 36 ózge de nysandy sapaly ári úzdiksiz jylýmen qamtamasyz etýge múmkindik beredi. Buryn tóselgen jylý trassasynda aǵashtar men jasyl jelekterdiń bolýyna baılanysty jobada ınjenerlik dálizge balama bolmaǵandyqtan, kesilgen aǵashtar men butalardyń ornyna jańasy otyrǵyzylady»,- dep habarlady kompanııadan.
Júrgizilgen túgendeý men orman-patologııalyq zertteýge sáıkes, aǵashtardy saqtaý múmkin emes.
«Jylý jelilerin qaıta qurý ýchaskesinde barlyǵy 310-ǵa jýyq aǵash jáne 101 buta bar, onyń 177 aǵash pen buta kesiledi», - dep tolyqtyrdy «Almaty jylý jelileri» JShS.
Qurylys jumystaryn júrgizý kezinde osy ýchaskede saqtalýǵa tıis barlyq jasyl jelek qorshaýmen qorǵalady.
Qalanyń ekojúıesin nyǵaıtý úshin qaıta qurýdy júzege asyratyn «AlmatyInjStroı» AQ merdigerlik uıymy arnaıy tańdalǵan ýchaskelerde kesilgen aǵashtardyń ornyna 1770 túp aǵash otyrǵyzady.
Ósimdikterdi otyrǵyzý boıynsha barlyq jumys Almaty qalasy ekologııa jáne qorshaǵan orta basqarmasynyń turaqty baqylaýynda bolady.
Qalanyń ekologııa jáne qorshaǵan orta basqarmasynyń málimetinshe, 2024 jyly Almatyda 320 myń jasyl jelek otyrǵyzý josparlanǵan.
«Almaty jylý jelileri» JShS aqparaty boıynsha, júrgizilip jatqan rekonstrýktsııa – bul bolashaqta senimdi jáne tıimdi jylýmen jabdyqtaýdy qamtamasyz etýge baǵyttalǵan mańyzdy is-shara, óıtkeni bul qubyr 25 jyldan astam ýaqyt boıy paıdalanylyp keledi.
«Almaty jylý jelileri» JShS aldaǵy ınjenerlik jelilerdi jańǵyrtýǵa túsinistikpen qaraýdy suraıdy.