Almatyda jyl basynan beri 3 myń adam qyzylsha juqtyrǵan

<p>ALMATY. KAZINFORM &ndash; Almaty qalasynyń sanıtarııalyq-epıdemıologııalyq baqylaý departamenti shahardaǵy qyzylsha dertiniń taraýy jáne oǵan qarsy vaktsınatsııalaý jumystary jaıly derektermen bólisti.</p>

Almaty qalasynyń sanıtarııalyq-epıdemıologııalyq baqylaý departamenti málimetine sáıkes, 2024 jyldyń basynan bastap 02 mamyrdy qosa alǵanda qyzylshanyń 3014 rastalǵan jaǵdaıy tirkelgen. Onyń ishinde: 14 jasqa deıingi balalar arasynda – 1828 jaǵdaı (60,7%), 15 jastan 18 jasqa deıingi jasóspirimder arasynda – 133 (4,4%) jáne eresekter arasynda – 1053 (34,9%). Departament balalar arasynda bul dert taraýynyń basty sebebi retinde vaktsınatsııadan bas tartý ekenin habarlaıdy.

«Qyzylshany juqtyrýdy, sondaı-aq onyń asqynýyn boldyrmaıtyn jalǵyz tıimdi qural – vaktsınatsııa. Qyzylshaǵa qarsy josparly vaktsınatsııa 2 ret, birinshisi – 1 jasta (12-15 aı), ekinshisi – 6 jasta júrgiziledi, bul vaktsınatsııadan keıingi ımmýnıtetti damytýǵa múmkindik beredi. 2023 jylǵy 10 qarasha men 2024 jylǵy 02 mamyrdyń aralyǵynda qalada qyzylsha, qyzamyq, parotıtke qarsy qosymsha jappaı ımmýndaý sheńberinde barlyǵy 161 620 adam qamtyldy. Ekpelerdi júrgizý úshin DDU sertıfıkattaǵan jáne Qazaqstan Respýblıkasynda tirkelgen qyzylshaǵa, qyzamyqqa, parotıtke qarsy aralas vaktsına qoldanylady. Vaktsınatsııa turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi», – dep habarlaıdy Sanıtarııalyq-epıdemıologııalyq baqylaý departamentinen.

Sondaı-aq departament tarapynan aýrýdyń belgileri paıda bolǵan kezde kelesi qaǵıdalardy qatań túrde ustaný usynylady:

- ózin-ózi emdeýmen aınalyspaý, dárigerdi úıge shaqyryp jáne dárigerdiń nusqaýy boıynsha em alý;
- úıde bolý, jumys jáne oqý oryndaryna, sondaı-aq qoǵamdyq jáne mádenı-buqaralyq is-sharalar oryndaryna barmaý. Ásirese, ambýlatorııalyq emdelip jatqan naýqastar úıde oqshaýlaýdy qatań saqtaýy kerek;
- aýyrǵan balalardy uıymdasqan ujymdarǵa, mektepterge, MDBU-ǵa, t.b jibermeý.