Almatyda jer silkinisinen zardap shekken nysandardy qalpyna keltirýge qandaı kómek beriledi

<p>ALMATY. KAZINFORM - Almaty ákimdigi jer silkinisi saldarynan zaqym kelgen ǵımarattar anyqtalǵan jaǵdaıda ne isteý kerektigin túsindirdi.</p>

Almaty ákimdiginiń málimetinshe, aýdandyq ákimdikter janynda Tótenshe jaǵdaılar departamenti, Qala qurylysyn baqylaý basqarmasy, aýdandyq sáýletshiler men basqa da ýákiletti organdardyń ókilderi bar komıssııa toby jumys isteıdi.

Zaqym kelgen nysandar anyqtalǵan jaǵdaıda qala turǵyndary aýdan ákimdigine fotomaterıaldarmen birge ótinish berýleri qajet. Ary qaraı komıssııa músheleri ótinish negizinde zaqymdaný deńgeıin aldyn ala anyqtaý úshin ǵımaratqa kóshpeli tekseris júrgizedi. ıAǵnı, olar tirek qurylymdarynyń buzylýy nemese tóbe, sylaq, kafel, qasbetti árleý sııaqty árleý materıaldarynyń elementterine qatystylyǵyn anyqtaıdy.

Aýdandyq komıssııalardyń barlyq materıaly Qalalyq josparlaý jáne ýrbanıstıka basqarmasynda jınaqtalady. Keıin ol Qazaq qurylys jáne sáýlet ǵylymı-zertteý jáne jobalaý ınstıtýtyna (QazQSǴZI) jiberiledi. Óz kezeginde QazQSǴZI mamandary belgili bir nysannyń zaqymdaný sebebi men onyń dárejesi týraly qorytyndy shyǵarady.

«Qalpyna keltirý jumysyn qarjylandyrýǵa keler bolsaq, áleýmettik nysandar búlingen jaǵdaıda jóndeý jumystary bıýdjet qarajaty esebinen júrgizilmek. Al kóppáterli turǵyn úılerdiń árleý elementteri zaqymdanǵan jaǵdaıda jóndeý jumystaryn kondomınıým qarajaty esebinen júrgizý qajet. Ǵımarattardyń tutastyǵyna qaýip tóndiretin zaqym bolǵan jaǵdaıda, memlekettik organdardyń bıýdjetinen qarjy bólinetin bolady», — dep habarlady Almaty ákimdiginiń baspasóz qyzmeti.