Almatyda jer silkinisine shydamaıtyn eń osal nysandar — kirpishten salynǵan úıler

<p>ALMATY. KAZINFORM&nbsp;&mdash; Qazaq qurylys jáne sáýlet ǵylymı-zertteý jáne jobalaý ınstıtýty megapolıstegi ǵımarttar men turǵyn úılerdiń jer silkinisine qarsy qaýipsizdik pasportyn jasap jatyr. Onyń aıasynda 16 700-den astam nysan zertteledi.</p>

«QazQSǴZI» AQ óndiris jónindegi basqarýshy dırektory Eraly Shoqbarovtyń aıtýynsha, 2017-2018 jyldary 10525 nysan tekserildi. Apattyń aldyn alý men zilzala jaǵdaıynda shyǵynǵa ushyramas úshin júrgizilip jatqan seısmoaýdıt 2024 jyldyń jeltoqsanyna deıin jalǵasady.

Zertteletin nysannyń basym bóligi — áleýmettik ǵımarattar. Odan bólek, kóppáterli turǵyn úıdiń de jaıy jan-jaqty qaralady.

— 2017-2018 jyldar kezeńinde QazQSǴZI seısmıkalyq tózimdilik turǵysynan qalanyń 10 158 obektisine pasporttaý júrgizdi. Nátıjesinde 3 087 nysan seısmıkalyq turǵyda tózimdi emes dep tanyldy. 2023-2024 jyldar boıynsha 16701 ǵımaratqa seısmıkalyq aýdıt júrgizý josparlanǵan. Búgingi kúni 10 myńnan astam nysannyń qujaty tekserildi. Málimeter alynyp, esep-qısap jasaldy. Almaty qalasy 9-10 baldyq aımaq bolǵannan keıin, zilzala kezinde qandaı ǵımarattar qıraıdy, qansha shyǵyn ketedi — sonyń bári esepteledi, — deıdi maman.

Spıkerdiń sózinshe, Almaty qalasyndaǵy qurylys eki kezeńge bólindi.

— Keńes kezinde salynǵan jáne ekinshisi — táýelsizdik alǵannan keıin turǵyzylǵan ǵımarattar. Keńes kezindegi úıdiń bári tıptik. Toǵyz qabatty paneldi-qańqaly úıler. Bul úıler boıynsha málimet joq. Sondyqtan olardy pasporttaý qajet boldy. ıAǵnı, onyń qurylymyn, salynǵan jylyn, qandaı aqaýy bar — sony zertteımiz. Paneldi-qańqaly úılerdiń birinshi qabatynan dúken, dámhanalar ashyp tasataǵan. Osynyń bári ǵımarat qurylymynyń álsireýine ákeledi. Joba boıynsha onda qabyrǵa bolǵan, ony alyp tastaǵan. Pasporttaý kezinde osyny nazarǵa alamyz. Jeti baldyq jer silkinisi bolsa, qandaı ǵımarattar birinshi qıraıdy, ol ne úshin qulaıdy — osyǵan saraptama jasalady. Keıin Almaty qalasynyń ákimdigine, tótenshe jaǵdaılar departamentine málimet beremiz, — dep túsindirdi Eraly Shoqbarov.

Qorytyndyǵa sáıkes, ákimdik tarapynan qajetti sharalar qoldanylady.

— Máselen, áleýmettik nysandarǵa nyǵaıtý jumysyn júrgizedi. Ol qolǵa alyndy. Eń aldymen kirpishten salynǵan ǵımarattardy nyǵaıtý qajet. Óıtkeni, kirpishtiń seısmıkalyq tózimdiligi osal bolyp keledi. Almatyda 50-60 jyldary salynǵan mektepter bar. Onyń bári kezinde qurylys normasyna saı salynǵan. Búgingi kúni qurylys normasy ózgerdi. Eń sońǵy ózgeris 2021 jyly engizildi. Onyń bári normalardy qatańdatýǵa baǵyttalǵan, — deıdi spıker.

Sonymen qatar, ol turǵyn úıge nyǵaıtý jumysy jasalmaıtynyn tilge tıek etti. Ony buzyp, ornyna jańasyn salǵan abzal.

Aıta keteıik, Almatyda 2030 jylǵa deıingi jańartý baǵdarlamasynyń jobasy ázirlengen. 

Qalalyq ákimdik áleýmettik nysandardyń qaýipsizdigine erekshe nazar aýdaryp otyr. Byltyr 8 mektep pen 1 balabaqshaǵa seısmıkalyq nyǵaıtý jumystary júrgizilgen. Bıyl taǵy 11 ǵımarattyń qurylymy jaqsartylady.

Eske salaıyq, byltyr Memleket basshysy Almatyda seısmoaýdıt júrgizý josparyn maquldaǵan bolatyn. Bul shahardaǵy nysandardyń qujattaryn jańartýǵa múmkindik beredi. 

Osyǵan deıin Tótenshe jaǵdaılar mınıstri Shyńǵys Árinov Almatyda jer silkinisi bolǵan jaǵdaıda zardap shekkenderge arnalǵan shatyrly qala bolatynyn jetkizgen edi.