Almatyda jemqorlyq táýekelderine júrgizilgen taldaý asynda 24 adam jaýapqa tartyldy

<p>Almaty qalalyq sybaılas jemqorlyqqa qarsy qyzmet bıyl 8 monıtorıng júrgizgen. Tekseris jumystary boıynsha 129 usynys engizilip, 24 tulǵa jaýapqa tartyldy.</p>

Bul týraly óńirlik kommýnıkatsııalar qyzmetiniń brıfınginde QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń basshysy Arman Raqymov aıtty, dep habarlaıdy QazAqparat tilshisi.

Spıkerdiń aıtýynsha, sybaılas jemqorlyq táýekelderiniń aldyn alý úshin kartada kórsetilgen segiz negizgi sala anyqtaldy, olar: qurylys jáne turǵyn úı, ekologııa, jer, bıznes, ekonomıka jáne qarjy, fıskaldyq, áleýmettik, ınfraqurylym jáne joldar.

«Osy jyly sybaılas jemqorlyqqa qarsy 8 monıtorıng jáne sybaılas jemqorlyq táýekelderine 3 syrtqy taldaý júrgizildi, onyń qorytyndysy boıynsha 129 usynys engizildi, 24 tulǵa jaýapqa tartyldy. Memlekettik organnyń erekshe baqylaýynda bıznes salasy da bar. Aıta keteıik, 600 kásipkerdiń quqyǵy qorǵaldy. Kásipkerlik qyzmetke aralasqany úshin 3 laýazymdy tulǵa ákimshilik jaýapkershilikke tartyldy. 7 fakt boıynsha ÁQBtK-niń 465-babyna sáıkes, ruqsat berý tártibi men merzimin buzǵany úshin 4 adam jaýapqa tartyldy. Budan basqa, 9,2 mlrd teńge óteldi jáne 5,4 mlrd teńge buǵattaldy» - deıdi Arman Raqymov.

Sondaı-aq byltyr sybaılas jemqorlyq quqyq buzýshylyqtar týraly habarlaǵany úshin 2,6 mln teńge somasyna 13 adamnyń eńbegi qarjylaı baǵalandy. Osy jyly 520 myńnan astam somaǵa 3 azamat yntalandyryldy.