Almatyda jartastan qulaǵan balany qutqarǵan otstavkadaǵy polıtsııa polkovnıgi marapattaldy

<p>ALMATY. KAZINFORM - Almaty taýlarynda 8 qyrkúıek kúni jartastan qulap ketken balany qutqarǵan otstavkadaǵy polıtsııa polkovnıgi Jalǵas Ábıev Qazaqstan Respýblıkasy Tótenshe jaǵdaılar mınıstri Shyńǵys Árinovtyń buıryǵymen &laquo;Tótenshe jaǵdaıdaǵy erligi úshin&raquo; tósbelgisimen marapattaldy.&nbsp;</p>

Marapattaý rásimi Almaty qalasy TJD ahýaldyq ortalyǵynda ótti. Tótenshe jaǵdaılar mınıstriniń atynan marapatty TJD bastyǵy Nurlan Atyǵaev tabystady. 

Aıta ketken jón, 2024 jylǵy 8 qyrkúıekte saǵat 11:57-de Almaty qalasy TJD 112 pýltine Almaty oblysyndaǵy «Prohodnoe» shatqaly «Terra alańy» týrıstik aımaǵyda jartastan balanyń qulaǵany týraly habarlama kelip túsken. Oqıǵa ornyna dereý QR TJM Respýblıkalyq jedel-qutqarý jasaǵy jáne Almaty qalasy ákimi apparatynyń Qutqarý qyzmeti qutqarýshylary jiberildi. 

Qutqarýshylar kelgenge deıin otstavkadaǵy polıtsııa polkovnıgi Jalǵas Ábıev kómek suraǵan ananyń aıqaıyn estip, 10 metrlik jartas shatqalynan qulap ketken balaǵa kómekke kelgen.

- Jalǵas Ábıev jaǵdaıdy baǵalaı otyryp, taý relefteriniń qaýiptiligin, óte saq bolý kerektigin túsine otyryp, zardap shekken balany izdestirýge kiristi. Balanyń qulaǵan oryndy taýyp, 10 jasar bala esinen talmaǵanyna kóz jetkizdi. Іshki ister organdary qyzmet etý kezinde alǵan daǵdylaryn qoldana otyryp, dereý alǵashqy dárigerlik kómek kórsetti. Osylaısha, Jalǵas Qurmanqalymuly Ábıev óziniń azamattyq ustanymyn kórsete otyryp, tótenshe jaǵdaıdy tez jáne durys baǵalaı bilý qabiletin kórsetti, balanyń densaýlyǵy men ómirin saqtaý úshin durys sheshim qabyldady, - dep habarlady TJD baspasóz qyzmeti.

Foto: Almaty qalasy TJD

Oqıǵa ornynan balany «Qazavıaqutqarý» AQ MI-8 borty alyp ketip, QR TJM AMO brıgadasy kútip turǵan aerodromǵa jetkizdi. Zardap shekken bala Ortalyq balalar aýrýhanasynyń jansaqtaý bólimine jatqyzyldy. Búgingi tańda balanyń jaǵdaıy jaqsy, turaqty.

Atap ótý qajet, otstavkadaǵy polıtsııa polkovnıgi Jalǵas Qurmanqalymuly Ábıev 23 jyldan asa memlekettik qyzmette jumys istegen.

Eske salaıyq, buǵan deıin Qaraǵandy oblysynda adasyp ketken áıel qutqarylǵanyn jazǵanbyz.