Almatyda jarnamaǵa salynatyn jańa salyq mólsherlemesi bekitildi

<p>ALMATY. KAZINFORM &ndash; Almatyda LED-ekrandaǵy jarnamaǵa salynatyn salyq mólsherlemesi artady. Búgin qalalyq máslıhattyń kezekti XXII sessııasynda depýtattar syrtqy jarnamany ornalastyrǵany úshin aı saıynǵy tólemniń jańa mólsherlemesin bekitti.&nbsp;</p>

Qalalyq josparlaý jáne ýrbanıstıka basqarmasynyń basshysy Nurlan Boranbaevtyń sózinshe, buryn salyq kodeksiniń mólsherlemesine sáıkes jarnamany ornalastyrǵany úshin aı saıynǵy tólem – 20 AEK (73 840 teńge) bolsa, endi máslıhat sheshimine sáıkes «A» sanatyna jatatyn kóshelerde ornalasqan nysandar boıynsha aı saıynǵy tólem – 40 AEK (147 680 teńge) bolady.

Nurlan Boranbaev atap ótkendeı, aı saıynǵy tólemniń bazalyq mólsherlemesiniń ósýi Almatynyń elimizdegi eń iri megapolıs bolýyna jáne ashyq keńistikte ornalastyrylǵan jarnamanyń áleýetti tutynýshylarynyń kóptigine baılanysty. Sonymen qatar bul nysandar elektr qýatyna, jer ýchaskelerine qosymsha júkteme túsiredi.

«Qala aýmaǵynda 825 LED-ekran bar, onyń 728-i «A» sanatyna jatatyn kóshelerde ornalasqan. Bul rette, bir LED-ekranda aı saıyn 10-nan 15-ke deıin jarnama berýshi ónimin ornalastyrylady. Mólsherlemeniń ózgerýi jergilikti bıýdjetti aıyna 55,9 mln teńgege ulǵaıtýǵa múmkindik beredi», - dedi Nurlan Boranbaev. 

Onyń aıtýynsha, qala kásipkerlerine osy ózgeristerdi bıyl aqpan aıynda habarlanǵan. Qaýlynyń tıisti jobasy «Ashyq NQA» saıtynda kópshilik talqylaý úshin jarııalandy.

Osyǵan deıin, Almatydaǵy Saıran kóliniń jaǵalaýyn abattandyrýǵa 4 mlrd teńge bólingeni týraly jazǵan edik.