Almatyda jarylǵysh zat týraly jalǵan aqparat taratqan eki stýdent ustaldy
Polıtsııa departamentiniń málimetinshe, Almatydaǵy kolledjderdiń birine jarylǵysh zat qoıylǵany týraly habarlama 13 qarasha kúni saǵat 10:35-te kelip túsken.
Qalanyń tótenshe jaǵdaılar jáne jedel qyzmetteri dereý ǵımarat pen onyń mańaıyna komıssııalyq tekserý júrgizdi, nátıjesinde jarylǵysh qurylǵylar, oq-dáriler nemese basqa da qaýipti zattar tabylǵan joq.
Jalǵan aqparat berdi degen kúdikpen 1-shi kýrsta oqıtyn 16 jastaǵy J. esimdi jáne 15 jastaǵy T. esimdi stýdentter ustaldy.
Olardyń áreketi QR QK-niń 273-babymen (Terrorızm aktisi týraly kórineý jalǵan habarlaý) saralandy.
«Aıǵaqty zattar tárkilendi, olar boıynsha saraptama taǵaıyndaldy. Atalǵan derek boıynsha sotqa deıingi tergeýdi Bostandyq aýdandyq PB janyndaǵy polıtsııa bólimi júrgizip jatyr», - dep habarlady departamentten.
Almaty polıtsııasy jalǵan habarlama taratqan adam qylmystyq jaýapkershilikke tartylatynyn taǵy da eske salady.