Almatyda jaryǵy joq kóshede mopedshi qorshaýǵa soǵylyp, qaıtys boldy

<p>ALMATY. KAZINFORM &ndash; Áleýmettik jelide túngi ýaqytta moped júrgizýshisiniń qorshaýǵa soǵylǵan beınejazbasy tarady. Beınerolıktegi <a href="https://www.instagram.com/reel/C-1kNpEtINt/?igsh=c2kyczc4dmljYmt2" target="_blank" rel="noopener">kadrlardan</a> mopedshiniń kóshe sońyndaǵy qorshaýdy qarańǵydan baıqamaǵanyn kórýge bolady.</p>

«Beıimbetov kóshesinen tómenirek, Tátibekov kóshesiniń boıynda durys jaryqtyń bolmaýynan moped qorshaýdy kórmeı, qaqpaǵa soǵyldy. Oqıǵadan bir adam qaıtys boldy, biri reanımatsııada jatyr», - delingen beınejazbada.

Bul aqparatty qalalyq Polıtsııa departamenti rastady.

«Atalǵan oqıǵa 5 tamyz kúni boldy. Qazirgi tańda Medeý aýdandyq polıtsııa bóliminde bul derek boıynsha tergeý júrgizilip jatyr», - dep habarlady PD baspasóz qyzmeti.

Biz Tátibekov kóshesinde jaryqtyń nege durys bolmaǵanyn surap, Medeý aýdanynyń ákimdigine saýal joldadyq. Aýdan ákimdigi qaıǵyly oqıǵadan keıin kóshedegi shamdar aýystyrylǵanyn habarlady.

«19 tamyzda áleýmettik jelilerdegi apat týraly habardan keıin Tátibekov kóshesin aýdan ákimi ózi aralap kórip shyqty. Tekserý barysynda 121 shamnyń ekeýi jumys istemeıtini anyqtaldy: bireýi kósheniń sońynda, endi biri ortasynda. «Almaty Qala Jaryq» MKK merdigerlik uıymy aqaýdy joıdy. Buǵan deıin, 2024 jyly 27 maýsymda ákimmen kezdesýde turǵyndar Tátibekov kóshesiniń mańyndaǵy jaıaý júrginshiler aımaǵyna qatysty máseleni kótergen. Tekseris kezinde búkil kóshe qaralyp, nátıjesinde 28 sham aýystyryldy. Tátibekov kóshesiniń mańyndaǵy jaıaý júrginshiler aımaǵyn jaryqtandyrý úshin jaqynda qosymsha tirekter ornatý josparlanyp otyr», - dep habarlady ákimdikten.

Eske salaıyq, buǵan deıin Almatydaǵy «Gorelnık» termaldy bulaǵynyń tazalyǵyna kim jaýapty ekenin jazǵanbyz.