Almatyda úıin jylyjaıǵa aınaldyryp, qarasora ósirgen kúdikti ustaldy

<p>ALMATY. KAZINFORM - Almatyda iri esirtki zerthanasy joıyldy. Polıtsııa qyzmetkerleri úıin jylyjaıǵa aınaldyryp, qarasora ósirgen kúdiktini ustady.</p>

Esirtki zerthanasy Áýezov aýdanynyń jeke sektorynda ornalasqan. Krımınaldyq polıtsııa jáne esirtki qylmysyna qarsy kúres basqarmasynyń qyzmetkerleri ony arnaıy is-shara barysynda anyqtady.

– Qylmystyq is-áreketti uıymdastyrǵan 36 jastaǵy er adam ustaldy. Atap aıtqanda, jylyjaı qyzmetin atqarǵan úıden 270 túp qarasora, 3 bóshke ıisi bar suıyqtyq, 3 qap tyńaıtqysh, 17 qyshqyl eritindisi, tamaq tarazysy, 23 jaryqtandyrý shamy jáne t.b. zerthanalyq qural-jabdyqtar tabyldy. “Tehnolog” qylmystyq áreketin moıyndady. Atalǵan derek boıynsha Áýezov aýdandyq polıtsııa basqarmasynyń qyzmetkerleri sotqa deıingi tergeý amaldaryn bastady, – dedi Almaty qalalyq PD krımınaldyq polıtsııa basqarmasynyń bastyǵy Talant Isaev.

Sonymen qatar polıtsııa qyzmetkerleri esirtkini óndirýge qatysy bolýy múmkin basqa da adamdardy, sondaı-aq ony taratý arnasyn anyqtaý boıynsha jedel is-sharalar júrgizip jatyr.

QR QK-niń 201-babyna sáıkes ózge aqparat tergeý múddesine oraı jarııa etilmeıdi.

Eske salaıyq, buǵan deıin Ekibastuzda sıntetıka óndiretin esirtki zerthanasy joıylǵanyn jazǵanbyz.