Almatyda úlken qoqysty qaıda ótkizýge bolady

<p>ALMATY. KAZINFORM &ndash; Úlken qoqystardyń durys shyǵarylmaýy - Almaty úshin ózekti máselelerdiń biri. Shahardyń &laquo;Mádenı qala&raquo; ataǵy bolsa da, 2 mıllıonǵa jýyq turǵyny bar megapolıste ruqsat etilmegen aımaqqa jaramsyz dıvan, dóńgelek syndy úlken qoqystardy tastap ketetin jaǵdaılardy jıi kórýge bolady.</p>

Kún saıyn Almatyda 2 myń tonnadan astam qatty-turmystyq qoqys jınalyp, qala syrtyndaǵy qoqys suryptaý zaýytyna shyǵarylady. Biraq qatty turmystyq qaldyqtarmen birge, iri qoqys alynbaıdy. Sebebi Almaty qalasy máslıhatynyń sheshimimen №505 bapqa sáıkes baspaldaq alańdarynda, kireberisterde nemese konteınerler mańyndaǵy konteınerlik alańdarda úlken kólemdi qoqystardy jınaýǵa tyıym salynady. Mundaı oryndarǵa úlken qoqysty tastap ketý aıyppulǵa ákelýi múmkin:

- Jeke tulǵalar úshin - 20 AEK;

- Zańdy tulǵalar úshin - 30 AEK.

Qala ákimdiginiń resmı málimetine sáıkes, almatylyqtar úshin matrats, dóńgelek, eski dıvan nemese qajetsiz tońazytqysh syndy iri qoqysty ekologııalyq taza túrde tapsyrýǵa arnalǵan eki meken-jaı qarastyrylǵan. Olar:

- 7-shi kóshe, 134/12 (Alǵabas yqsham aýdany);

- 144-shi eseptik toqsan, 4690 (Aıteı aýyly, Qarasaı aýdany, Almaty oblysy).