Almatyda úleskerlerdiń 3,5 mlrd teńgesin jymqyrǵan 7 adam sottaldy

<p>ALMATY. KAZINFORM &ndash; Almatyda 150 úleskerlerdiń 3,5 mlrd teńgesin jymqyrǵan 7 aıyptalýshyǵa sot úkimi shyqty.&nbsp;</p>

Almaly aýdandyq sotynda asa iri mólsherdegi alaıaqtyq deregi boıynsha qylmystyq is qaraldy.

Almatyda qurylys kompanııasynyń atyn paıdalanyp «Úsh qońyr» jáne «Vesnovka» turǵyn úı keshenderinen aldyn ala páter satqan 7 rıeltor 150 azamattan 3,5 mlrd teńge jınap alyp, olardy baspanasyz qaldyrǵan. Nátıjesinde, qurylys salýshy aldanyp qalǵan úleskerlerge keltirilgen materıaldyq shyǵyndy tolyǵymen óteýge májbúr boldy.

Tergeý organdary ony osy qylmystyq is boıynsha jábirlenýshi dep tanydy. Sotta sottalýshylar alaıaqtyq jasaǵan kinásin moıyndamady. 

Jábirlenýshi sottalýshylardan materıaldyq zalaldy óndirýdi surady, taǵaıyndalar jaza merzimin sottyń qalaýyna qaldyrdy. Memlekettik aıyptaýshy sottan sottalýshylarlyń bas bostandyǵynan aıyrý jazasyn taǵaıyndaýdy surady. 

«Sot, sottalýshylar K., J., M., R., Sh., E., N. QK-niń 2-tarmaǵynyń 190-baby 4-bóligi boıynsha kináli dep tanyp, olarǵa 5 jyldan 6 jyl 8 aıǵa deıin bas bostandyǵynan aıyrý jazasyn taǵaıyndady jáne jábirlenýshiniń azamattyq talabyn qanaǵattandyrdy», - dep habarlady sottan. 

Sot úkimi zańdy kúshine engen joq.

Buǵan deıin Almaty ákimi «Úsh qońyr» jáne «Vesnovka» turǵyn úı keshenindegi daýly páterlerge qatysty pikir bildirip, onda páterler satýǵa tyıym salynǵanyn aıtqan bolatyn. Keıin úleskerlerdi aldap kelgender qamaýǵa alynǵany týraly jazǵan edik.