Almatyda turǵyn úıler men shópter arasynda órtke qarsy mıneraldanǵan jolaqtar paıda bolady

<p>ALMATY. KAZINFORM - Almaty qalasy men oblysynyń memlekettik orman qory aýmaǵynda 20 naýryzdan bastap órtke qaýipti kezeń jarııalandy. Bul týraly Almaty qalasy TJD Memlekettik órt baqylaý basqarmasynyń basshysy Konstantın Kanın aıtty.</p>

Spıker órtke qarsy qyzmettiń 20 bólimshesi megapolıstiń órtke qarsy qaýipsizdigin qamtamasyz etetinin atap ótti.

«Táýlik saıyn shuǵyl shaqyrtý úshin jeke quramnyń keminde 280 adamy men 70-ten astam negizgi jáne arnaıy tehnıka jumyldyrylady. Aıtý kerek, qala aýmaǵyna Іle-Alataý ulttyq saıabaǵynyń 19 803 ga, Medeý tabıǵı saıabaǵynyń 708,2 ga jáne Baým toǵaıynyń 137,7 ga jeri kiredi. Ótken jyldyń órt qaýipti kezeńinde qala aýmaǵynda jalpy aýdany 13 ga jerde qurǵaq ósimdikterdiń janýynyń 300 oqıǵasy tirkeldi. Negizgi sebepter turǵyndardyń otpen abaısyz bolýy jáne turmystyq qoqystardyń áserinen (shyny bótelkeler, shyny synyqtar jáne t.b.) qurǵaq shóptesinderdiń ózdiginen janýy boldy», - dedi Konstantın Kanın.

Ol ótken jyly taýly-ormandy jerlerde órttiń aldyn alý maqsatynda TJD, qalalyq polıtsııa departamenti jáne orman sharýashylyǵynyń ókilderinen mobıldi top qurylǵanyn aıtty. Mobıldi top 161 reıd júrgizdi. Nátıjesinde myńnan astam azamatqa nusqaý berildi, 228 ot jaǵýdyń joly kesildi, 129 adam jalpy somasy 7 mln jýyq teńgege ákimshilik jaýapqa tartyldy.

Іle-Alataý ulttyq saıabaǵynda ortalyqtandyrylǵan beınemonıtorıng jáne erte anyqtaý júıesin ornatý josparlanyp otyr.

«Osy jyldyń sáýir aıynda Almaty qalasynyń tótenshe jaǵdaılardyń aldyn alý jáne joıý jónindegi komıssııasynyń otyrysyn ótkizý josparlandy. Onda azamattyq qorǵaý qyzmetterine túrli tapsyrmalar berilip, orman aýmaqtaryn órtten qorǵaýdyń qajetti deńgeıin qamtamasyz etý jónindegi is-sharalar ázirlenetin bolady. Ótken órt qaýipti kezeńniń tájirıbesin eskere otyryp, Almaty qalasynyń aýdan ákimdikterine turǵyn úı sektory men qurǵaq ósimdikterdiń arasynda mıneraldanǵan jolaqtar qurý qajettiligi týraly hattar joldandy», - dedi spıker.

Megapolıs aýmaǵynda órt qaýiptiligi joǵarylaǵan kezde TJD qosymsha sharalar qabyldaıdy. Bul rette kúshter men quraldar kúsheıtilgen qyzmet nusqasyna aýystyrylady, mehanıkalandyrylǵan kúzetter tutanýǵa beıim ýchaskelerge qoıylady.

«Almaty men onyń aınalasyndaǵy tabıǵattyń shyn máninde biregeı ekenin eske salǵym keledi. Tek ortaq kúsh-jigermen ǵana biz ony saqtap, kóbeıte alamyz», - dedi Konstantın Kanın.

Ol taýly-ormandy jerlerde órt qaýipsizdigi erejelerin eske saldy:

- órt shyǵýy múmkin demalys oryndarynda qoqysty qaldyrmaı, ózimen birge alyp ketý kerek;

- sirińke, temeki tuqyldaryn tastamaý, qurǵaq shópti órtemeý kerek;

- ot jaǵýǵa bolmaıdy, osy maqsattar úshin arnalmaǵan jerlerde mangaldar men basqa da tamaq daıyndaýǵa arnalǵan qurylǵylardy paıdalanbaý kerek.