Almatyda tumaý juqtyrǵandardyń 60 paıyzy balalar

<p>ALMATY. KAZINFORM — Almatyda ótken aptada 7527 bala tumaý juqtyrǵan.</p>

Bul týraly Almaty qalasy Sanıtarlyq-epıdemıologııalyq baqylaý departamentiniń basshysy Qasymhan Alpysbaıuly aıtty.

Onyń aıtýynsha, ótken aptada JRVI, tumaý aýrýlarynyń 12164 jaǵdaıy tirkelgen. 100 myń turǵynǵa shyqqandaǵy kórsetkishi — 530.

— Tumaý juqtyrǵandardyń sany ótken jyldyń osy kezeńimen salystyrǵanda 2 ese tómen jáne aldyńǵy aptamen salystyrǵanda 34,8% paıyzǵa (18659 jaǵdaı) azaıǵan. Jalpy bul aýrýdyń 61,9% balalardy qamtıdy. Sonymen qatar, qalada jiti respıratorlyq vırýstyq ınfektsııalardyń basqada vırýstary: rınovırýs, bokavırýs, RS vırýs, adenovırýs, paragrıpp, maýsymdyq koronavırýstar aınalymda júr, — dedi Qasymhan Alpysbaıuly.

Sanıtarlyq-epıdemıologııalyq baqylaý departamentiniń málimetine sáıkes, JRVI-ǵa zerttelgen 107 synamanyń 33-inde tumaýǵa jatpaıtyn basqa da JRVI vırýstary anyqtalǵan. Alaıda olardyń qatarynda JRVI-dyń bir túrine jatatyn metapnevmovırýs anyqtalǵan joq.

Eske salaıyq, buǵan deıin QR Densaýlyq saqtaý mınıstrligi el aýmaǵynda metapnevmovırýstyq ınfektsııa jaǵdaılary anyqtalǵanyn habarlady.

Atap aıtqanda, SQO-da tórt adamnan metapnevmovırýs anyqtaldy.