Almatyda Tóregeldi Sharmanovty sońǵy saparǵa shyǵaryp salý rásimi ótti
Tóregeldi Sharmanovpen qoshtasý rásimi Almaty qalasynda S.D. Asfendııarov atyndaǵy Qazaq ulttyq medıtsına ýnıversıtetiniń «Concordia» teatrynda ótti.
Belgili otandasymen qoshtasýǵa memleket jáne qoǵam qaıratkerleri, úkimet músheleri, oblys ákimderi, parlament depýtattary, medıtsına jáne basqa da salalardyń ókilderi keldi.
Qoshtasý rásiminde sóz sóılegen QR Parlament májilisiniń tóraǵasy Erlan Qoshanov Qazaqstan prezıdenti Qasym-Jomart Toqaevtyń kóńil aıtý hatyn oqydy.
«Memleket jáne qoǵam qaıratkeri, akademık Tóregeldi Sharmanovtyń otbasy men týystaryna. Asa kórnekti ǵalym, Taǵam taný akademııasynyń prezıdenti, Qazaqstannyń Eńbek Eri Tóregeldi Sharmanovtyń ómirden ótýine baılanysty qaıǵylaryńyzǵa ortaqtasyp, kóńil aıtamyn.Tóregeldi Sharmanuly sanaly ǵumyryn ult densaýlyǵyna arnaǵan biregeı tulǵa, bıik parasat ıesi edi. Otandyq medıtsınanyń alǵa basýyna, bar qajyr-qaıratyn jumsap, kóptegen ıgi iske bastamashy boldy. Qazaq taǵamtaný ǵylymynyń kókjıegin keńeıtip, dúnıejúzi uıymy ıÝNISEF jáne basqa da halyqaralyq uıymdarmen yntymaqtastyq baılanys ornata bildi. Óziniń jańasha mektebin qalyptastyryp, ulaǵatty urpaq tárbıeledi.Aınalasyna syıly, ǵıbratty ǵumyr keshken Tóregeldi Sharmanulynyń jarqyn beınesi halyqymyzdyń júreginde máńgi saqtalady. Marqumnyń ımany salamat, jany janatta bolsyn», — delingen memleket basshysynyń kóńil aıtý hatynda.
T. Sharmanov Almatydaǵy Keńsaı zıratyna jerlendi.
Tóregeldi Sharmanov 1930 jyly 19 qazanda Qaraǵandy oblysynyń Ulytaý aýdanynda dúnıege kelgen. Qaraǵandy memlekettik medıtsına ınstıtýtyn jáne onyń aspırantýrasyn bitirgen.
Tóregeldi Sharmanuly Respýblıkanyń Densaýlyq saqtaý mınıstrligin 12 jyl basqaryp, alǵashqy medıtsınalyq-sanıtarlyq kómektiń teńdesi joq júıesin qurdy. 1974 jyldan bastap respýblıkadaǵy jetekshi ǵylymı uıymdardyń biri – Qazaq taǵamtaný akademııasynyń turaqty meńgerýshisi.
2005 jyly akademık Sharmanovqa Dúnıejúzilik densaýlyq saqtaý uıymynyń joǵary erekshelik dárejesi – Leon Bernard syılyǵy berildi, onyń ıegeri búkil álem tarıhynda nebári 29 adam bolǵan. Bul densaýlyq saqtaý salasyndaǵy Nobel syılyǵynyń bir túri sanalady.
Eske salaıyq, 25 mamyrda medıtsına ǵylymdarynyń doktory, professor, gıgıenıst-nýtrıtsıolog ǵalym, Qazaqstannyń eńbek sińirgen qaıratkeri, akademık Tóregeldi Sharmanov 94 jasqa qaraǵan shaǵynda ómirden ótti.
Memleket basshysy Qasym-Jomart Toqaev asa kórnekti ǵalym Tóregeldi Sharmanovtyń otbasyna kóńil aıtý jedelhatyn joldady.