Almatyda terrorıstik turǵydan osal obektiler tekserilip jatyr

<p>ALMATY. KAZINFORM - Almatyda terrorıstik turǵydan osal obektilerge, atap aıtqanda, iri saýda ortalyqtary, ǵıbadat oryndary men qoǵamdyq tamaqtaný nysandarynyń terrorızmge qarsy qaýipsizdiginiń jaı-kúıine josparly tekserý bastaldy.</p>

Almaty qalalyq polıtsııa departamentiniń málimetinshe, shaǵyn jáne orta kásipkerlik sýbektilerin tekserýge moratorııdiń aıaqtalýyna baılanysty keıbir obektilerge tekseris sharasy ótip jatyr.

«Polıtsııanyń tıisti bólimsheleri terrorızmge osal nysandardy qorǵaýdy baqylaýdy uıymdastyrý baǵytynda turaqty jumys istep, olardyń basshylary men ıelerine túsindirý jumystaryn júrgizedi. Terrorızmge osal nysandardyń ınjenerlik-tehnıkalyq beriktigi men terrorızmge qarsy qorǵanysynyń tıisti zańnama talaptaryna sáıkestigin tekseretin arnaıy jumys toptary quryldy», — dedi Almaty qalalyq polıtsııa departamenti bastyǵynyń orynbasary Qýatbek Naýatov.

Polıtsııa qyzmetkerleri sondaı-aq MEGA saýda ortalyǵyna bardy. Atap aıtqanda, ortalyqtyń beınebaqylaý júıeleri, tótenshe jaǵdaılarǵa áreket etý mehanızmi jáne dabyl túımeleri tekserildi.

«Terrorıstik turǵydan osal obektilerdiń árbir qyzmetkeri terrorıstik qaýip tóngen jaǵdaıda áreket etý algorıtmin bilýi kerek. Mysaly, kúdikti zat anyqtalsa, ony ustaýǵa, jyljytýǵa, kez kelgen nársemen jabýǵa jáne basqa da áreketter jasaýǵa qatań tyıym salynady. Bul jaǵdaıda tıisti qalalyq qyzmetterge habarlaý kerek. Saýda nysandarynyń dırektorlaryna terrorızmge qarsy qorǵaný talaptaryn oryndamaǵany úshin ákimshilik jaýapkershilik qarastyrylǵany eskertildi», — dedi Qýatbek Naýatov.

Eske salaıyq, Almatyda MEGA saýda ortalyǵynda jas jigitke álimjettik jasaǵan kúdikti ustalǵan bolatyn.