Taksı júrgizýshisin óltirgen eki jasóspirim 12 jylǵa sottaldy

<p>ALMATY. KAZINFORM &mdash; Almatyda taksı júrgizýshisin óltirgen kámeletke tolmaǵan eki bala 12 jylǵa bas bostandyǵynan aıyryldy.</p>

Almaty qalasynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen kámeletke tolmaǵan G. jáne H.-ǵa qatysty is qaraldy.

«2023 jyldyń jazynda sottalýshylar G. men H. Shymkent-Almaty baǵytyna taksı shaqyrtqan. Dittegen jerine jetken kezde, aıyptalýshylar aldyn ala sóz baılasý arqyly 40 myń teńge kólemindegi qyzmet aqysyn tólemeý maqsatynda taksı júrgizýshisi P.-ny óltirgen», - dep habarlady Almaty qalasy sotynyń baspasóz qyzmeti.

Sot aıyptalýshylardyń júrgizýshige birneshe ret pyshaq suqqanyn jáne sonyń saldarynan er adam oqıǵa ornynda qaza tapqanyn anyqtady. Artynsha sottalýshylar jábirlenýshiniń kóligi men 80 myń teńge turatyn uıaly telefonyn urlap ketken. Prokýror aıyptalýshylardy kináli dep tanyp, árqaısysyn 10 jylǵa bas bostandyǵynan aıyrýdy surady.

Alaıda jasóspirimder kinásin moıyndamady.

«Alqabıler alqasynyń úkimimen sottalýshylar G. jáne H. kináli dep tanyldy. Árqaısysy 12 jyldan bas bostandyǵynan aıyryldy», - dep habarlady sottan.

Úkim zańdy kúshine engen joq.