Almatyda taǵy da avtobýspen júk kóligi soqtyǵysty
Oqıǵanyń beınejazbasy áleýmettik jelide tarady.
Almaty qalasy Polıtsııa departamentiniń málimetine sáıkes, jol-kólik oqıǵasy búgin saǵat 17:00 shamasynda bolǵan. Júk kóliginiń júrgizýshisi Úshqońyr kóshesiniń boıymen batys baǵytta artqa qaraı júrip bara jatyp, Janqoja batyr kóshesimen soltústikke qaraı kele jatqan 45-shi baǵyttaǵy qoǵamdyq kólikpen soqtyǵysqan.
— Bul jol-kólik oqıǵasy saldarynan eshkim zardap shekken joq. Alataý aýdandyq polıtsııa basqarmasynyń qyzmetkerleri jol-kólik oqıǵasynyń mán-jaıyn anyqtaýǵa kiristi, — dep habarlady qalalyq PD baspasóz qyzmeti.
Osyǵan deıin Almatyda eki avtobýs apatqa ushyryp, júrgizýshileri zardap shekkeni týraly jazǵan edik.
Almatynyń qoǵamdyq kólikteri sońǵy 4 jylda myńǵa jýyq márte jol apatyna ushyraǵan.
Eske salaıyq, buǵan deıin Ákimshilik polıtsııa komıteti bıyl 22 myń jol apaty tirkelip, 2 myń adam qaza tapqanyn habarlaǵan bolatyn.