Almatyda taǵy bir zańsyz turǵyn úı buzylyp jatyr
Almatynyń qala qurylysyn baqylaý basqarmasynyń málimetine sáıkes, «Ermensaı» shaǵyn aýdanyndaǵy, 7-shi burylys, 8-ýchaskede ornalasqan turǵyn úı kesheni sot sheshimimen zańsyz dep tanyldy.
Nysanǵa júrgizilgen jospardan tys tekserý barysynda «MGM Development» JShS atalǵan turǵyn úı kesheniniń qurylysyna sáýlet–josparlaý tapsyrmasyn almastan, eskızdik jobany kelisýsiz, qurylys-montaj jumystarynyń bastalǵany týraly habarlamasyz, memlekettik saraptama, avtorlyq jáne tehnıkalyq qadaǵalaýsyz bastaǵany anyqtaldy.
2022 jyly 21 jeltoqsanda tapsyrys berýshige qatysty ákimshilik sharalar qoldanylyp, anyqtalǵan zańbuzýshylyqtardy joıý týraly nusqama berildi. 2023 jyly 25 sáýirde Almaty qalasynyń Mamandandyrylǵan aýdanaralyq ekonomıkalyq sotyna nysandy súrý týraly talap aryz berildi. 2023 jyly 27 jeltoqsanda Almaty qalalyq soty MAES-nyń nysandy súrý týraly sheshimin ózgerissiz qaldyrdy, menshik ıesiniń apellıatsııalyq shaǵymy qanaǵattandyrylmady.
– Búgin nysandy súrý jumystary Ádilet departamentiniń sot oryndaýshylarynyń qatysýymen bastaldy, - dep habarlady basqarmadan.
Almatyda ótken jyldyń basynan beri 50 zańsyz nysan, sonyń ishinde «Mechta», KHAN, «Alma Garden» turǵyn úı keshenderi jáne basqa da nysandar tolyq nemese jartylaı buzyldy.
Eske salaıyq, buǵan deıin Almatyda zańsyz salynǵan tehnıkalyq qyzmet kórsetý ortalyǵy buzylǵanyn jazǵan edik.