Almatyda tabıǵı petroglıfter parki ashyldy
Botanıkalyq baqtan málim etkendeı, «Arqalan» tabıǵı petroglıfter parki – «Botanıka jáne fıtoıntrodýktsııa ınstıtýty» men «Petroglıfter ańshylary» qoǵamdyq birlestiginiń jobasy.
Bul Qazaqstan tarıhynyń túrki dáýirindegi petroglıfterdiń art nysandarynyń biregeı galereıasy. Ataýly nysandar áıgili petroglıf sýretshisi Sanjar Jubanov pen músinshi Saıd Aınekovtiń týyndylary.
Parktiń jobasy Zıra Naýryzbaıdyń qatysýymen ázirlendi.
«Botanıka jáne fıtoıntrodýktsııa ınstıtýtynyń mańyzdy mindetteriniń biri zertteý, tabıǵatty qorǵaý, bilim berý jáne mádenı-aǵartý.Tarıhı turǵydan alǵanda, adamzat qaýymdastyǵynyń damýy qorshaǵan orta jaǵdaılarymen anyqtaldy jáne óz kezeginde adamnyń ekonomıkalyq jáne mádenı qyzmeti landshafttardy, flora men faýnanyń sıpattamalaryn ózgertti. Tabıǵatpen tyǵyz birlikte Qazaqstan aýmaǵynda ejelgi ýaqytta kóshpendiler órkenıetin týdyrǵan biregeı dala mádenıeti qalyptasty. «Arqalan» tabıǵı petroglıfter parki bul baılanystyń aıqyn kórsetkishi»,- dedi «Botanıka jáne fıtoıntrodýktsııa ınstıtýtynyń» bas dırektory Gúlnara Sıtpaeva.
«Petroglıfter ańshylary» qoǵamdyq birlestiginiń atqarýshy dırektory Olga Gýmırova, mundaı sheshimge osydan úsh jyl buryn Arqarly ekspedıtsııasynda jumys istep júrgen kezde kelgenderin jetkizdi.
«Mundaı saıabaqty qurý ıdeıasy burynnan bolǵan. Biz eldiń shynaıy, tiri tarıhyn qoljetimdi etkimiz keldi. «Arqalan» kelýshiler úshin Qazaqstannyń ejelgi mádenıeti men tarıhyn zertteýge alǵashqy qadam bolatynyna senimdimin. Nazar aýdarý, óz kezeginde, mádenı murany saqtap qalýǵa yqpal etedi»,- deıdi ol.
«Arqalan» tabıǵı petroglıfter parkin Almaty qalasynyń bas botanıkalyq baǵynyń jumys ýaqyttarynda baryp kórýge bolady. Ol baqtyń ońtústik-shyǵys bóliginde «Qazaqstan» ekspozıtsııasynyń aýmaǵynda ornalasqan.
Qazaqstanda shamamen 300 myń biregeı petroglıf bar. Jartastaǵy sýret úlgileri myńdaǵan jyldar boıy qalyptasqan. Olar el tarıhy men mádenıetiniń damý barysyn kórsetedi.
Eske salaıyq, osy jyldyń naýryz aıynda úshinshi Ulttyq quryltaıda Memleket basshysy Qasym Jomart Toqaev «Qazaqstan petroglıfter eli» dep kezdeısoq atalmaıtynyn atap ótken bolatyn.