Almaty sút bezi qaterli isigi birinshi orynda tur
Sút beziniń qaterli isigi – áıelder arasynda jıi kezdesetin qaterli isik túriniń biri. Almatyda jyl saıyn 700-ge jýyq jańa jaǵdaı anyqtalady, ıaǵnı bul dıagnoz kúnine eki áıelge qoıylady.
Almaty onkologııalyq ortalyǵynyń mammolog-dárigeri Naılıam Aqjolovanyń aıtýynsha, sút bezin júıeli túrde ózdiginen tekserý jáne ózgeris anyqtalǵan jaǵdaıda dárigerge barý sút bezi qaterli isigin erte anyqtaýdyń negizgi sharasy.
«Ózdigen tekserý aıyna bir ret bir kúni, etekkir aıaqtalǵannan keıingi alǵashqy birneshe kúnde júrgizilýi kerek. Eger keýdede túzilis, syrtqy kórinistiń ózgerýi, emiziksheden suıyqtyq aǵý, emizik nemese areola pishininiń ózgerýi, teriniń qyzarýy baıqalsa, birden dárigerge qaralý kerek. Áıel ataýly eshteńe aýyrmasa, dárigerge baryp, ÝDZ-ge, mammografııaǵa túsýdiń qajeti joq degen stereotıpti buzýy kerek», - deıdi Naılıam Aqjolova.
Dárigerdiń sózinshe, sút bezi qaterli isiginiń barlyq sebebiniń shamamen 10%-y genetıkalyq ózgeriske baılanysty. Alaıda bul aýrýdyń kóp jaǵdaıy ómir salty men reprodýktıvti minez-qulyq faktorlaryna baılanysty, olardy baqylaýǵa bolady.
«Metabolızm protsesi medıtsınadaǵy eń úlken problemanyń biri. Erte etekkir jáne kesh menopaýza sút bezi qaterli isiginiń qaýpin eki ese arttyrady. Mıoma, endometrıoz, adenomıoz, qant dıabeti, gıpotıreoz jáne sút beziniń qatersiz isikteri sııaqty gınekologııalyq aýrýlar da qaýipti arttyrady. Bosanbaǵan nemese bosanǵannan keıin emizbegen áıelderde qaterli isikke shaldyǵý qaýpi 1,5 ese joǵary, júktilikti toqtatý da qaýipti arttyrady», - dep atap ótti dáriger.
Maman sút bezi qaterli isigi erte satysynda anyqtalsa, onda qazirgi emdeý ádisterimen ony 100% emdeýge bolatynyn jetkizdi.
«18-20 jastan bastap árbir qyz bala óz denesin kútip, júıeli túrde profılaktıkalyq tekserýden ótýi kerek», - deıdi Naılıam Aqjolova.