ALMATY. KAZINFORM – Almatyda sot sheshimimen zańsyz salynǵan kólik jýý ortalyǵy buzyldy. Almatynyń Qala qurylysyn baqylaý basqarmasynyń málimetinshe, Bekmahanov kóshesiniń batysynda Soltústik aınalma kóshesiniń soltústik jaǵyndaǵy ýchaskedegi nysandy jospardan tys tekserý barysynda tıisti ruqsat qujatynyń joqtyǵy anyqtaldy.
Basqarma aýdandyq sotqa zańsyz turǵyzylǵan nysandy buzýǵa shaǵym túsirgen.
«Jetisý aýdandyq sotynyń 2022 jylǵy 9 maýsymdaǵy sheshimimen avtokólik jýý óz betinshe salynǵan dep tanyldy. Jaqynda menshik ıesi qalalyq Ádilet departamentiniń sot oryndaýshylarynyń qatysýymen nysandy erikti túrde buzdy», - dep atap ótti basqarma ókilderi.
Jalpy, Almaty ákimi Erbolat Dosaevtyń zańsyz qurylysqa baqylaýdy kúsheıtý jónindegi tapsyrmasy aıasynda ótken jyldyń basynan beri 38 zańsyz nysan súrildi. Onyń ishinde turǵyn úı keshenderi, ákimshilik ǵımarattar men meıramhanalar bar.
Alma Muqanova
Alma Muqanova T. Júrgenov atyndaǵy óner akademııasynyń «Kıno jáne Televızııa» fakýltetiniń túlegi. Jýrnalıstıka salasynda 20 jyldan beri eńbek etip keledi. Aımaqtyq, respýblıkalyq telearnalarda túrli qyzmetter atqarǵan. 2019 jyldan beri - QazAqparat agenttiginiń tilshisi. QR Jýrnalıster odaǵynyń múshesi.