Almatyda soǵys ardageri Vıktor Izıýmnıkov 100 jasqa toldy
«Ekinshi dárejeli «Uly Otan soǵysy» jáne «Jaýyngerlik eńbegi úshin» marapattarynyń ıegeri, áýe-desanty áskerleriniń jalǵyz ardagerine Desanttyq-shabýyldaý áskerleriniń, qorǵanys isteri jónindegi qalalyq departamenttiń áskerı qyzmetshileri, Almaty qalasy Qarýly kúshterdiń ardagerleri keńesiniń ókilderi qurmet kórsetti.
Vıktor Izıýmnıkovke QR Qorǵanys mınıstri general-polkovnık Rýslan Jaqsylyqov pen Almaty óńirlik garnızonynyń bastyǵy general-maıor Almaz Jumakeevtiń atynan quttyqtaý jetkizilip, estelik syılyqtar tabys etildi.
Mereıtoı ıesi 1924 jyly burynǵy Oral oblysy Zelenov aýdany Chernoıarov eldimekeninde dúnıege kelgen. 1942 jyly 17 jasynda maıdanǵa shaqyrtý alǵan jas jigit Lenıngrad áskerı baılanys ýchılışesine jiberiledi. Bul oqý orny sol kezde Oralǵa kóshirilgen edi. Oqýdy bitirmeı jatyp 1943 jyldyń maýsymynda bir top kýrsant áýe-desanty áskerlerine jiberiledi.
Vıktor Izıýmnıkov Máskeý oblysynyń Stýpıno qalasyndaǵy 17-shi desanttyq gvardııalyq brıgada quramynda maıdanǵa kiredi. Osy áskerı bólimniń sapynda ol Vengrııa men Avstrııadaǵy urystarǵa qatysty. Vena men Chehoslovakııamen shekaradaǵy Znaıme (Znoımo) qalasyn azat etýge qatysyp, jeńisti qarsy aldy.
Soǵys aıaqtalǵannan keıin shaıqasta shyńdalǵan jaýynger aǵa serjant ataǵyn alyp, radıostantsııa bastyǵy laýazymyna taǵaıyndaldy.
Áskerden keıin Vıktor Izıýmnıkov eńbek maıdanyna aralasty. Tyń jáne tyńaıǵan jerlerdi ıgerýge qatysty. Ol – Qazaqstannyń eńbek sińirgen agronomy, ekonomıka ǵylymdarynyń kandıdaty, eki ret Joǵarǵy Keńestiń depýtaty bolyp saılandy. Qazaqstan Kompartııasy OK múshesi, Qazaqstan Mınıstrler Keńesiniń is basqarýshysy boldy.
«Búginde ol – Almatyda turatyn áýe-desanty áskerleriniń jalǵyz ardageri. Vıktor Karpovıchtiń bizben birge bir sapta bolǵanyn maqtan tutamyz. Jastardy desanttyq baýyrlastyq rýhynda tárbıeleımiz. Biz úshin qurmetti aqsaqal batyldyqtyń, tabandylyqtyń jáne áskerı boryshqa adaldyqtyń naǵyz úlgisi, - dep atap ótti Desanttyq-shabýyldaý áskerleri qolbasshysynyń orynbasary polkovnık Radjan Janysov.
Ardager áskerı qyzmetshilerge rızashylyǵyn bildirip, batasyn berdi.
«Antqa adal bolyp, elge qyzmet etińizder. Prezıdentimiz jańa Qazaqstannyń qurylysy týraly jarııalady. Bul tapsyrmany oryndaý kóbine jastarǵa baılanysty. Eń bastysy – beıbitshilik pen birlikti saqtaý, sonda biz tabysqa jetemiz», - dedi soǵys ardageri.