Kýágerlerdiń aıtýynsha, oqıǵa Almatydaǵy Gogol men Masanchı kósheleriniń qıylysynda bolǵan.
Aqparatty Ulttyq ulanynyń «Ońtústik» óńirlik qolbasshylyǵynyń baspasóz qyzmeti rastady.
Resmı málimet boıynsha, 2025 jylǵy 4 qazanda 5571 áskerı bóliminde merzimdi qyzmettegi sarbaz úshinshi qabattan sekirip ketken. Ol Almaty shuǵyl medıtsınalyq járdem aýrýhanasyna jetkizilip, qajetti kómek kórsetilip jatyr.
— Dárigerler oǵan «beıimdelý buzylysy» dıagnozyn qoıdy. Sarbaz áskerge shaqyrylmas buryn jaqyn týysynan aıyrylǵan jáne áskerı-dárigerlik komıssııanyń sheshimin kútip júrgen. Komıssııa onyń áskerı qyzmetti jalǵastyrýǵa jaramdylyǵyn anyqtaýǵa tıis bolǵan, — delingen resmı jaýapta.
Ulttyq ulanynyń «Ońtústik» óńirlik qolbasshylyǵynyń baspasóz qyzmeti sonymen birge beınebaqylaý kameralarynyń jazbalarynan oqıǵaǵa ózge adamdardyń qatysy joq ekenin málimdedi. Qazir qyzmettik tekseris taǵaıyndalyp, mán-jaı anyqtalyp jatyr.
Eske salaıyq, buǵan deıin Mańǵystaýda ózine jaraqat salǵan sarbaz psıhıkalyq densaýlyq ortalyǵyna jatqyzylǵanyn jazǵan edik.