Almatyda iri qoıma órtendi

<p>ALMATY. KAZINFORM - Almatynyń Alataý aýdanynda bir qabatty qoıma órtendi.</p>

Almaty qalasy TJD bastyǵynyń birinshi orynbasary Baǵdat Chaızadanyń aıtýynsha, 20:50-de Alataý aýdany Sharıpov 40a mekenjaıy boıynsha ornalasqan qoımany jalyn sharpyǵany týraly qońyraý túsken jáne oqıǵa ornyna TJD kúshteri jiberilgen.

- Oqıǵa ornyna kelgen órt sóndirýshiler qasyndaǵy tıpografııaǵa ótý qaýpi bar bir qabatty qoımadaǵy ashyq órtti anyqtady. Qazirgi ýaqytta oqıǵa ornyna 73 adam jáne 23 tehnıka jumyldyryldy. Órt oqshaýlandy, - dedi Baǵdat Chaızada.

TJD málimetine sáıkes, zardap shekkender týraly aqparat túsken joq. Oqıǵanyń basqa da mán-jaılary anyqtalyp jatyr.

Eske salaıyq, buǵan deıin Alakóldik qoryqshylar muz ústinde júre almaı qalǵan elikti qutqarǵanyn jazǵan edik.