Almatyda otqa oranǵan úıdiń ishinde 13 jastaǵy jasóspirim qamalyp qalǵan

<p>Almatyda otqa oranǵan úı-jaıdyń ishinde 13 jastaǵy jasóspirim qamalyp, shyǵa almaǵan, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Almaty qalalyq TJD-nyń málimetinshe, 28 jeltoqsan kúni saǵat 12:11-de TJD kúshteri men quraldary Alataý aýdanyndaǵy «Shańyraq-2» shaǵyn aýdany, Jalańtós Bahadúr kóshesine jiberildi.

«Órt sóndirý bólimsheleri kelgen sátte jeke turǵyn úıdiń aýmaǵynda 60 sharshy metr aýmaǵynda úı-jaıdyń órtenip jatqany anyqtaldy. Órttiń kórshiles qurylystarǵa taralý qaýpi tóndi. 19–MÓSB gaz-tútinnen qorǵaý qyzmeti órtti sóndirýge shuǵyl oqpandar engizip, avtotsısternalar órt gıdranttaryna ornatyldy. Osylaısha sý berý jumystary qamtamasyz etildi. Qabyldanǵan sharalarmen órt saǵat 12:37-de oqshaýlanyp, 12: 52-de joıyldy», - delinedi TJD habarlamasynda.

Sondaı-aq órt sóndirýshiler kelgenge deıin kórshi turatyn TJM Respýblıkalyq jedel-qutqarý jasaǵynyń qutqarýshysy Muhamadıev Ulan men Atzakır Arman esimdi azamat (kýrer) samannan jasalǵan qabyrǵany tesip, otqa oranǵan ýaqytsha úı-jaıdyń ishinde qamalyp qalǵan 2010 jyly týǵan balany qutqaryp aldy.

«Eger qyraǵy kórshiler bolmasa, qaıǵyly jaǵdaı bolar edi», - dep habarlady Almaty qalasy TJD men Respýblıkalyq jedel qutqarý jasaǵynan.