Almatyda órtengen hostelde turǵan stýdentter qaı JOO-da oqıtyn edi

<p>Almatyda órtengen hostelde turǵan 12 stýdent - alty joǵary oqý orynnyń stýdentteri bolatyn. Bul týraly Almaty qalalyq jastar saıasaty basqarmasy basshysynyń orynbasary Azız Qajdenbek aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Hostelde turǵan 72 adamnyń 12-si stýdent edi. Olar — ál-Farabı atyndaǵy Qazaq ulttyq ýnıversıteti, Asfendııarov atyndaǵy Qazaq ulttyq medıtsına ýnıversıteti, Sport jáne týrızm akademııasy, Energetıka jáne kommýnıkatsııalar ýnıversıteti, Kaspıı ýnıversıteti, Qurmanǵazy atyndaǵy konservatorııanyń stýdentteri bolatyn», — dedi Azız Qajdenbek.

Eske salsaq, Almatyda hostel órtenip, 13 adam qaza tapty.

Hostelden 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.

Onda turǵandardyń deni — stýdentter men jas jumysshylar bolǵan. Pákistan men Úndistannan kelgen medıtsına ýnıversıtetiniń stýdentteri de bar.

QR Premer-Mınıstri Álıhan Smaıylovtyń ókimimen órt sebebin tekserý jáne onyń saldaryn joıý jónindegi úkimettik komıssııa quryldy.

Órttiń shyǵý sebepterin tekserý úshin mınıstr, general-maıor Syrym Sháriphanovtyń basshylyǵymen TJM-nyń jedel toby oqıǵa ornyna attandy.

Qylmystyq kodeksiniń 292-babyna sáıkes qylmystyq is qozǵaldy. 

Almaty ákimdigi jerleý rásimin uıymdastyrýǵa jáne qaza tapqandardyń denesin tasymaldaýǵa kómektesedi.

Memleket basshysy qaza tapqan Qazaqstannyń jáne shetel azamattarynyń jaqyndary men týǵan-týystaryna kóńil aıtty.