Almatyda oqýshylardy tasymaldaıtyn avtobýs jetpeıdi

<p>ALMATY. KAZINFORM &ndash; Almaty ákimi Erbolat Dosaevtyń Alataý aýdanynyń turǵyndarymen kezdesýinde aýdan turǵyny qalalyq Bilim basqarmasynan №182 jáne №209 mektepterge qatynaıtyn avtobýs bólýdi suraǵanyn aıtty.</p>

«Bilim basqarmasynyń basshysy Lázzat Áýeshanqyzy bul mektepterge avtobýstar júre almaıtynyn aıtty. Erbolat Asqarbekuly, sizge úlken ótinish, osy máseleni sheship berseńiz. Bul mektepterde bala kóp, mektepke qatynaý da qıyn», - degen ótinishin jetkizdi aýdan turǵyny.

Bul másele boıynsha qalalyq Bilim basqarmasynyń basshysy Lázzat Jylqybaeva jaýap berdi.

«Erbolat Asqarbekuly, 1200 oryndyq №182-shi mektepte úsh myń bala oqıdy, 1500 oryndyq №209 mektepte 3800 bala oqıdy. Sol sebepti eger osy aýdannan basqa mektepterge avtobýstardy jiberý máselesi bolsa ony qarastyramyz, al basqa jaqtan bul eki mektepke avtobýstardy júrgize almaımyz. Sebebi bul mektepterde shamadan tys bala oqıdy», - dep jaýap berdi Lázzat Jylqybaeva.

Almaty ákimi Erbolat Dosaev bıyl Alataý aýdanyna qosymsha 30 mektep avtobýsy bólinetinin jetkizdi.

«Bilim basqarmasy siz aıtqan máseleńizdi muqııat tekserip, qarap shyǵady. Avtobýstar bar, biraq biz olardy kerek jerine jibereıik. Olar boıynsha aýdan ákimi de tekseris júrgizip, tıisti sheshim shyǵarady», - dedi Erbolat Dosaev.

Eske salaıyq, ótken jyly Almaty oqýshylary úshin «Mektep avtobýsy» pılottyq jobasy iske qosylǵan edi. 

Ol boıynsha kún saıyn 8 myńnan astam oqýshy mektepke qatynap júrgenin jazǵanbyz.