Almatyda ógeı balasyn óltirgen er adam 20 jylǵa sottaldy

<p>ALMATY. KAZINFORM &ndash; Azamattyq nekedegi áıeliniń kishkentaı balasyn uryp óltirgen 19 jastaǵy er adamǵa qatysty sot úkimi shyqty.</p>

Almatynyń qylmystyq ister jónindegi mamandandyrylǵan aýdanaralyq soty jas balany óltirdi dep aıyptalǵan er adamǵa qatysty qylmystyq isti qarady.

Sot anyqtaǵandaı, er adam 2023 jyldyń tamyz aıynan beri jaldamaly páterde balanyń anasymen birge turyp kelgen. Osy jyldyń qyrkúıek aıynda sottalýshy balanyń týǵan ákesinen kek alý maqsatynda kámeletke tolmaǵan ógeı uly H.-ny soqqyǵa jyqqan.

«Sottalýshy balanyń basy men asqazanyna 8-9 ret urǵan. Saldarynan baýyry jarylyp, ishki qan ketýden bala kóz jumdy. Keıin balany aýyr halde balabaqshaǵa aparyp tastaǵan. Nátıjesinde, bala balabaqshadan aýrýhanaǵa jetkizildi, birneshe kúnnen keıin ol emdeý mekemesinde alǵan jaraqattardan qaıtys boldy», – dep habarlady sottyń baspasóz qyzmeti.

Prokýror aıyptalýshyny 20 jylǵa bas bostandyǵynan aıyrýdy surady. 

Sottalýshy óz kinásin moıyndamady.

Jábirlenýshi tarap kinálige qatań jaza taǵaıyndaýdy surady.

«Sot D. QK 99-babynyń 3-bóligi boıynsha kináli dep tanyp, oǵan 20 jyl merzimge bas bostandyǵynan aıyrý jazasyn taǵaıyndady»,- dep atap ótti sottan.

Sot úkimi zańdy kúshine engen joq.

Eske salaıyq, byltyr qyrkúıek aıynda Almatyda 19 jastaǵy er adam ógeı ul balasyn uryp óltirgeni týraly jazǵan bolatynbyz.