Almatyda naızaǵaı saldarynan jer úı órtendi

<p>ALMATY. KAZINFORM &ndash; Almatyda naızaǵaıdyń áserinen jer úı órtendi. Órt sóndirýshiler órtti sóndirip, aýmaǵyndaǵy úı-jaılar men kórshiles úıge órttiń taralýyna jol bermedi, dep habarlaıdy Almaty ákimdiginiń <a href="https://www.instagram.com/reel/C5D8agmoksJ/?utm_source=ig_web_copy_link&amp;igsh=MzRlODBiNWFlZA%3D%3D" target="_blank" rel="noopener">Instagram</a> paraqshasyna silteme jasap.</p>

Órtengen úıdiń vıdeosy áleýmettik jelige shyqty. Onda «Uljan» shaǵynaýdanynda saǵat 18:20-da naızaǵaı túsýi saldarynan jer úıiń órtengeni jazylǵan.

Almaty qalalyq Tótenshe jaǵdaılar departamentiniń málimetinshe, 28 naýryz kúni saǵat 18:10-da órt sóndirýshiler jeke turǵyn úıdiń órtengeni týraly habarlama boıynsha «Uljan-1» shaǵynaýdany, Aqjaıyq kóshesi, 17-úı mekenjaıyna jiberildi.

«Kelgen sátte 120 sharshy metr aýmaqta jer úıdiń shatyry órtengeni anyqtaldy. Dereý órt oqpandary engizilip, avtotsısternalar órt gıdranttaryna ornatylady. Qabyldanǵan sharalardyń arqasynda órt saǵat 18:56-da oqshaýlanyp, 19:06-da sóndirildi. Órtti sóndirýge 14 tehnıka, jeke quramnyń 61 adamy jumyldyryldy», - dep habarlady TJD-nyń baspasóz qyzmeti.

Sondaı-aq, órtengen úıdiń aýmaǵyndaǵy úı-jaılar men 2-3 metr qashyqtyqta salynǵan kórshiles úıge ottyń taralýyna jol berilmedi. Órt sóndirýshiler órttiń naqty neden shyqqanyn anyqtap jatyr.

Eske salaıyq, búgin Almatyda jel kúsheıip, shańdy daýyl turdy. Artynan naızaǵaı oınap, jańbyr jaýdy.

Osyǵan baılanysty qalanyń qutqarýshylary men kommýnaldyq qyzmetteri kúsheıtilgen qyzmetke kóshti.