Almatyda Naýryz jańasha qalaı atalyp ótedi
Almaty ákimdiginen atap ótkendeı, basty sharanyń biri – «Kósh. Naýryz –dýman» 21 naýryzda ótedi. At jáne kostıým sherýine 500-ge jýyq adam qatysady. Merekelik basty kontsertter 21 naýryzda Astana jáne Respýblıka saraıynyń aldyndaǵy alańda, sondaı-aq qala aýdandarynyń barlyq negizgi alańdarynda uıymdastyrylady.
Sonymen, 10 kún ishinde «Naýryznama» kezeńinde almatylyqtar men megapolıs qonaqtary qolónershiler men qoldanbaly ónerdiń taqyryptyq kórmelerine, spektaklder men kontsertterge, shyǵarmashylyq sheberlik synyptary men poezııa keshterine, merekelik qaıyrymdylyq aktsııalaryna, jastar festıvalderine, zııatkerlik oıyndarǵa, ulttyq sport túrleri boıynsha jarystarǵa jáne túrli konkýrstarǵa qatysa alady.
Aıta keterligi, 25 jáne 50 jyl buryn otbasyn qurǵan erli-zaıyptylar arasynda «Kúmis kerege» jáne «Altyn shańyraq» baıqaýy uıymdastyrylady.
Sondaı-aq, medıtsınalyq mekemelerde qala turǵyndary úshin skrınıngten jáne profılaktıkalyq tekserýlerden ótý boıynsha aktsııalar josparlanǵan.
Zamanaýı ulttyq kıim tiginshileri «Tumar» sán aptalyǵyna qatysyp, kórermenderdi qýantpaq. Sondaı-aq sán ındýstrııasynyń ókilderi Fashion show ulttyq kıim konkýrsyna qatysatyn bolady.
Etnodızaınerler odaǵy 17-24 naýryz aralyǵynda Arbatta 100-ge jýyq kásibı sheberlerdiń qatysýymen qolóner jármeńkesin ótkizedi.
Ekobelsendiler, kommýnaldyq qyzmet ókilderi men belsendi azamattar aǵash otyrǵyzý, sý aıdyndaryn tazartý jáne aýla aýmaqtaryn jınaý boıynsha aktsııa uıymdastyrady.
Almatynyń barlyq teatrlarynda balalarǵa da, eresekterge de arnalǵan qoıylymdar kórsetiledi. Mysaly, Qýyrshaq teatry qazaq halyq ertegileri negizinde «Qańbaq shal», «Ur, toqpaq» jáne «Er Tóstik» qoıylymdaryn usynady.
Qazaq memlekettik tsırki balalar úılerine baryp birneshe qaıyrymdylyq qoıylym qoıady.
«Almaty áýenderi» ártisteri áleýmettik qyzmet kórsetý ortalyqtarynda qaıyrymdylyq kontsertter uıymdastyrady. Sondaı-aq «Alataý» dástúrli óner teatry «Mámlúk. Sultan Beıbarys» spektaklin qoıyp, birqatar qaıyrymdylyq kontsert ótkizedi, Almaty mýzeılerinde Ashyq esik kúni, Yqylas atyndaǵy halyq mýzykalyq aspaptar murajaıynda «Án júırigi Birjan sal» atty teatrlandyrylǵan mýzykalyq kesh uıymdastyrady, Memlekettik muraǵatta qazaq halqynyń salt-dástúrleri: uzatý, bet-ashar, tusaý keser, atastyrý, qala kitaphanalarynda vıktorına, kitap jármeńkeleri jáne basqa da taqyryptyq is-sharalar ótedi.
Sonymen qatar, Almatyda 14-30 naýryz aralyǵynda Nauryz fest jastar festıvali jáne 21-23 naýryz aralyǵynda Astana alańynda 10:00-de toǵyzqumalaq, asyq atý, bes asyq, arqan tartý, qazaq kúresi sııaqty ulttyq sport túrleri boıynsha sport festıvali ótedi.
Naýryz meıramyndaǵy merekelik kontsertter birneshe jerde ótedi:
– 21 naýryz kúni saǵat 11:00-de «NAÝRYZ – BEREKE BASTAÝY» merekelik kontserti Astana alańynda;
– 21 naýryzda saǵat 11:00-de T. Júrgenov atyndaǵy Qazaq ulttyq óner akademııasynyń aýmaǵynda jáne 21 naýryz kúni saǵat 12:00-de Abaı atyndaǵy alańda;
– 21-22 naýryzda Astana alańynda saǵat 19:00-den 22:00-ge deıin tanymal ártisterdiń qatysýymen kontsertter ótedi.
– 21-23 naýryz aralyǵynda Arbatta (Panfılov-Jibek joly kóshesi) Naýryz meıramyna arnalǵan oıyn-saýyq-tanymdyq baǵdarlamalar uıymdastyrylady.
Naýryz meıramyn merekeleý aıasynda Almatyda josparlanǵan mádenı-buqaralyq is-sharalar men túrli konkýrstardyń tizimi qala ákimdiginiń resmı saıtynda jarııalanǵan.