Almatyda múmkindigi shekteýli jandardy qoldaýǵa 13,2 mlrd teńge bólindi

<p>Almatyda bıyl áleýmettik kómek sharalarymen 52 myńnan astam adam qamtyldy jáne olarǵa 3,7 mlrd teńgeniń qyzmeti kórsetildi. Bul týraly óńirlik kommýnıkatsııalar qyzmetiniń brıfıngisinde qalalyq jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov aıtty, dep habarlaıdy QazAqparat tilshisi.</p>

Spıkerdiń málimetinshe, Almatyda 56 myńnan astam múgedek adam turady. Onyń 8 930–y 18 jasqa deıingi múgedektigi bar balalar.

«Megapolıste áleýmettik kómek sharalarymen 52 myńnan astam adam qamtyldy jáne olarǵa 3,7 mlrd teńgeniń qyzmeti kórsetildi, onyń ishinde 20 myńnan astam zeınetkerge 1,1 mlrd teńgeniń qyzmeti kórsetildi. Sondaı-aq, basqarmaǵa qarasty 10 medıtsınalyq-áleýmettik mekemede múgedekterge, múgedek balalarǵa, zeınetkerlerge jáne qıyn ómirlik jaǵdaıǵa tap bolǵan adamdarǵa statsıonar, jartylaı statsıonar, úıde qyzmet kórsetý jáne ýaqytsha bolý jaǵdaılarynda arnaýly áleýmettik qyzmetterdiń 8 túri kórsetiledi»,- dedi Baýyrjan Jaýbasov.

Budan basqa, azamattardyń segiz sanaty (zeınetkerler, soǵys ardagerleri, 1, 2 toptaǵy múgedektigi bar adamdar, kóp balaly otbasylar) kommýnaldyq qyzmetterge tarıfterdiń ósýine baılanysty aı saıyn 0,5 AEK nemese 1725 teńge mólsherinde áleýmettik kómek alady. Qazirgi ýaqytta bul kómek túrine 107 myńnan astam adam júgingen.