Almatyda múgedektigi bar adamdar úshin qajetti qurylǵylardy alýǵa 15 mlrd teńge jumsaldy

<p>ALMATY. KAZINFORM &mdash; Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov ınklıýzıvti orta qurý jónindegi baǵdarlamanyń qalaı iske asyrylyp jatqanyn Óńirlik kommýnıkatsııalar qyzmetiniń alańynda aıtyp berdi.</p>

Onyń aıtýynsha, 2024 jyly múgedektigi bar adamdardy qoldaýǵa jergilikti bıýdjetten 15 mıllıard teńgeden astam qarajat bólindi. Oǵan protez, arba, estý apparattary jáne basqa da qajetti qurylǵylar sııaqty tehnıkalyq ońaltý quraldary alyndy. Búgingi kúni megapolıste ońaltý qyzmetterimen 34 940 adam qamtylǵan.

Sondaı-aq, Baýyrjan Jaýbasov qalada múgedektigi bar adamdar úshin ınfraqurylymnyń qoljetimdiligin qamtamasyz etýge erekshe nazar aýdarylǵanyn atap ótti.

— 2024 jyly 15000 ınfraqurylym nysanyna tólqujat tapsyryldy. 2025 jylǵa deıin turǵyn úılerdi, qoǵamdyq keńistikterdi jáne aıaldama keshenderin qosa alǵanda 32 500 nysandy pasporttaýdy aıaqtaý josparlanyp otyr. Bul barlyq turǵyndary úshin qalalyq ortanyń qoljetimdiligin edáýir jaqsartýǵa múmkindik beredi, — dedi basqarma basshysy.

Eske salaıyq, buǵan deıin Aqtóbede múgedektigi bar 500 adam baspana alý quqyǵynan aıyrylǵanyn jazǵanbyz.