Almatyda mopedpen júrip 23 mln teńge urlaǵan kúdikti ustaldy

<p>ALMATY. KAZINFORM - Almaty polıtsııasy moped mingen uryny ustady. Jetisý aýdandyq polıtsııasynyń málimetinshe, ol iri kólemde aqsha urlyǵan.</p>

Jergilikti polıtsııaǵa 23 mıllıon teńge salynǵan sómkesi joǵalǵan azamat aryzdanǵan. Onyń aıtýynsha, jábirlenýshi kóligin az ýaqytqa qaldyryp ketip, qaıta oralǵan kezde áınektiń synǵanyn jáne sómkeniń joǵalǵanyn kórgen.

«Polıtsııaǵa kabel satýmen aınalysatyn kompanııanyń ókili aryzdanǵan. Onyń kóliginen 23 mıllıon teńge salynǵan sómke joǵalyp ketken. Bul qylmysty ashý maqsatynda arnaıy jedel-tergeý toby quryldy. Beınejúıelerdiń kómegimen jábirlenýshiniń áreketiniń hronologııasy qalpyna keltirilip, kúdiktiniń jábirlenýshiniń sońynan erip, bótenniń múlkin urlaý úshin qolaıly sátti kútip júrgendigi anyqtaldy. Tergeýdiń bir nusqasy boıynsha, qaskóı bireýdiń aıtýymen áreket etken bolýy múmkin – ol muqııat tekserilip jatyr», — dedi Jetisý aýdandyq polıtsııa basqarmasynyń bastyǵy Jánibek Shynasylov.

Polıtsııa málimetine sáıkes, kúdikti jyldam bolý úshin jáne baıqalmaý úshin mopedke minip, basyna dýlyǵa kıgen.

«Urlyq bolǵan kúnniń kelesi kúni kúdikti áıelimen birge urlanǵan kýpıýralardy dollarǵa aıyrbastaǵan. Bul derek te beınebaqylaý kameralaryna túsip qalǵan. Qazir kúdikti ustalyp, qamaýǵa alyndy. Osy derek boıynsha sotqa deıingi tergeý júrip jatyr», - dedi Jánibek Shynasylov.

Eske salaıyq, buǵan deıin Almatyda zeınetkerge qol kótergen jalǵan «UQK qyzmetkeri» ústinen is qozǵalǵanyn jazǵan edik.