Almatyda moped máselesi qashan sheshiledi

<p>ALMATY. KAZINFORM &ndash; Qys kezinde biraz ýaqyt demalysqa ketken mopedshiler kóktem kele Almatynyń kóshelerinde qaıtadan kóbeıdi. Jyldam kólik júrgizýshileriniń qaýipti qozǵalysyna shaǵym aıtqan Almaty turǵyndarynyń beınejazbalary áleýmettik jelilerde kúndelikti jarııalanyp keledi. Ótken jyldan beri qyzý talqylanyp kele jatqan bul másele bıyl óz sheshimin taba ma?</p>

Almaty qalasy Polıtsııa departamentiniń baspasóz qyzmeti jarııalaǵan resmı málimetke súıensek, bıyl kóktem-jazǵy kezeńde mopedtiń qatysýmen 301 jol-kólik oqıǵasy tirkelip, nátıjesinde 3 adam qaıtys bolǵan.

«Kóktem men jaz kezinde Almaty qalasynyń polıtsııasy qala joldarynda apattyq jaǵdaılardyń kóbeıýine áser etetin kóliktiń jekelegen túrleriniń jol qozǵalysyn qadaǵalaýdy kúsheıtti. Іs júzinde mototsıklder men mopedterdiń ıeleri tarapynan tirkeletin jol erejelerin buzý faktileri sırek emes. Ásirese, jol erejelerin buza otyryp manevr jasaý men jyldamdyq rejımin óreskel buzý jáne túngi ýaqytta ruqsat etilmegen jarystar azamattardyń tynyshtyǵyn buzady. Bul qala azamattary men basqa da jol qozǵalysyna qatysýshylardyń shaǵymdaryn týdyrady. Osyǵan baılanysty Almaty polıtsııasy kóliktiń balamaly túrlerin basqaratyn adamdardyń quqyq buzýshylyqtaryn anyqtaý boıynsha jumysty kúsheıtti. Jergilikti reıdter júrgizilýde», – dep habarlady Almaty qalasy PD baspasóz qyzmetinen.

Sondaı-aq departament tarapynan moped júrgizýshileriniń qatysýymen bolatyn jol-kólik oqıǵalarynyń basty sebepteri ataldy.

«Mototsıkldiń qatysýymen bolatyn jol-kólik oqıǵalarynyń negizgi sebepteri: belgilengen jyldamdyq rejımin saqtamaý, qarsy qozǵalys jolaǵyna shyǵý, qıylystardan ótý erejelerin buzý, manevr jasaý jáne t.b. Jyl basynan beri Almaty qalasynyń polıtsııasy moped júrgizýshileriniń 7 myń 522 jol qozǵalysy erejesin buzǵanyn anyqtady. Sonymen qatar osy ýaqyt aralyǵynda Almatyda mopedterdiń qatysýymen 301 jol-kólik oqıǵasy tirkelip, nátıjesinde 3 adam qaza tapty», – dep atap ótti departament baspasóz qyzmeti.

Ótken jyly Almaty qalasynyń ákimi Erbolat Dosaev Bostandyq aýdanynyń turǵyndarymen kezdesýine mopedshiler máselesi zańǵa ózgerister engizilgen kezde sheshiletinin aıtqan bolatyn.

- Zań júzinde olar (red. – moped) kólik quraldary retinde tanylyp, ár kólikke tıisti tirkeý júrgizilgennen keıin polıtsııa aıyppul salýǵa múmkindik alady. Basty másele – tamaq jetkizýshiler negizinen mopedke minedi. Olar tapsyrysty ýaqytyly jetkizý úshin kez-kelgen erejeni buzýǵa daıyn. Jol erejesin óreskel buzǵan mopedshilerge sharalar qabyldanady. Biz múmkindiginshe kúsh salamyz. Almatyda ǵana emes, búkil el boıynsha máseleni sheshýge múmkindik beretin eń jaqsy sheshim – bul zańnamalyq shekteýler, – dep pikir bildirgen Almaty qalasynyń ákimi.

Erbolat Dosaev zańǵa tıisti ózgertýler kúzge deıin enip, másele sol ýaqytta sheshilýi múmkin ekenin de aıtqan. Alaıda shahar basshysynyń boljamy oryndalmady. Májilis depýtattary tıisti zańnamalyq ózgeristerdi bıyl 15 mamyr kúni qabyldady. Májilistiń jalpy otyrysynda «Jol júrisi týraly» Zańyna jekelegen kólik quraldary túrleriniń júrýin uıymdastyrý jáne jol qaýipsizdigin tsıfrlandyrý máseleleri boıynsha ózgerister men tolyqtyrýlar engizý týraly» Zańy men ilespe qujat ekinshi oqylymda qabyldandy. Zań jobasynda kelesi normalar usynylǵan:

- qozǵaltqysh kólemi 50 tekshe santımetrden kem mopedterdi memlekettik tirkeý;

- moped júrgizýshisine qoıylatyn talaptardy belgileý;

- jergilikti atqarýshy organdarǵa elektr samokattardy paıdalaný tártibin aıqyndaý boıynsha quzyret berý;

- jol qaýipsizdigin tsıfrlandyrý.

Sonymen qatar zań jobasy kúshine engennen keıin jol qozǵalysy erejelerin buzǵan moped júrgizýshileri avtokólik júrgizýshileri sekildi jaýapqa tartylady. Buǵan deıin olarǵa jol qozǵalysynyń balamaly qatysýshylary retinde tek 2 AEK (7 384 teńge) aıyppul salynatyn.

Degenmen, mopedterdi memlekettik tirkeý zań qabyldanǵannan soń 6 aıdan keıin bastalady. Sondyqtan Almatyda mopedshiler máselesi bıyl da tolyq sheshilmeýi múmkin. Qazirgi ýaqytta zań jobasy Senattyń qaraýyna jiberildi.