Almatyda mektep býhgalteri 330 mln teńgeden astam bıýdjet qarajatyn urlaǵan

<p>ALMATY. KAZINFORM &ndash; Almaty qalasynyń prokýratýrasy tekseris barysynda balalardyń qaýipsizdigi salasynda birqatar zańbuzýshylyqty anyqtady.</p>

Oǵan aqparattyq qaýipsizdik salasyndaǵy jarty myńnan astam zańbuzýshylyq, balalardy tasymaldaý jáne bilim berý mekemelerin qorǵaý erejeleriniń, sanıtarlyq jáne órtke qarsy normalardyń buzylýy, sondaı-aq oqýshylar arasynda býllıng faktileriniń anyqtalýy dálel.

Tekserý nátıjesinde 10 sotqa deıingi tergep-tekserý bastalyp, shamamen 60 mln teńge óteldi, 67 qadaǵalaý aktisi engizildi jáne 100-den astam adam ákimshilik jaýapkershilikke tartyldy.

Budan basqa, quqyq buzýshylyqtarǵa jedel den qoıý maqsatynda, onyń ishinde oqýshylar arasyndaǵy býllıngke qatysty, oqýshylar nemese olardyń ata-analaryna onlaın rejımde qalalyq prokýratýraǵa tikeleı júginýge múmkindik beretin QR-kod ázirlendi.

Mektep psıhologtarynyń biliktiligin arttyrý maqsatynda qala prokýratýrasy NGS Jańa býyn mektebi alańynda memlekettik mektepterdegi barlyq psıhologtyń, kámeletke tolmaǵandardyń isteri jónindegi ýchaskelik ınspektorlardyń jáne bilim basqarmasy ókilderiniń qatysýymen semınar uıymdastyrdy.

Sonymen qatar prokýrorlar 330 mln teńgeden astam somaǵa bıýdjet qarajaty urlanǵanyn anyqtady.

Mysaly, Bostandyq aýdanynyń prokýratýrasy mektepterdiń birinde jalaqyǵa arnalǵan bıýdjet qarajatyn bas býhgalterdiń urlaǵanyn anyqtady.

Atalǵan quqyq buzýshylyq memleketke 160 mln teńge zalal keltire otyryp, mekteptiń jumys istemeıtin qyzmetkerlerine jáne óziniń jaqyn týystaryna aqsha qarajatyn aýdarý jolymen jasalǵan.

Osyǵan uqsas urlyq faktilerin Medeý, Almaly, Túrksib jáne Alataý aýdandarynyń prokýrorlary anyqtady.

Qazir sotqa deıingi tergep-tekserý amaldary júrgizilip jatyr.