Almatyda mas kúıinde kólik júrgizgen 500 júrgizýshi kólik basqarý quqyǵynan aıyryldy

<p>ALMATY. KAZINFORM - 2024 jyly Almatyda 6 myńnan astam jol-kólik oqıǵasy tirkelgen.</p>

Almaty qalasy Polıtsııa departamentiniń málimetinshe, byltyr jol apatynan 105 adam mert bolǵan jáne 7 myńnan astam azamat jaraqat alǵan. Onyń ishinde mopedter men elektrosamokattar 221 ret jol-kólik oqıǵasyna ushyraǵan. Sonyń saldarynan 17 adam qaza taýyp, taǵy 583 adam dene jaraqatyn aldy.

- Shahar joldarynda kún saıyn 1,5 mıllıonnan astam kólik júredi. 2024 jyly Almaty joldarynda jol qaýipsizdik erejelerin buzýdyń 4,2 mıllıonnan astam deregi anyqtaldy. Onyń ishinde 84 myńnan astam moped men samokat paıdalanýshylary ákimshilik jaýapkershilikke tartyldy. Jergilikti reıdter nátıjesinde 1700 moped mamandandyrylǵan aıyppul turaǵyna qoıyldy. 508 júrgizýshi kólikti mas kúıinde basqarǵany úshin ustalyp, kólik júrgizý quqyǵynan aıyryldy, - dep habarlady Almaty polıtsııasynan.

Eske salaıyq, buǵan deıin Almatyda qylmys deńgeıi 10 paıyzǵa tómendegenin jazǵanbyz.