Almatyda MÁMS esebinen 97 mlrd teńgege medıtsınalyq qyzmet kórsetildi

<p>ALMATY. KAZINFORM &mdash; 2024 jyly Almatyda mindetti áleýmettik medıtsınalyq saqtandyrý esebinen kórsetilgen qyzmetterge 97 mlrd teńgege jýyq qarjy jumsaldy. Bul týraly Óńirlik kommýnıkatsııalar qyzmetinde ótken brıfıngte Medıtsınalyq saqtandyrý qorynyń Almaty qalalyq fılıaly dırektory Іlııas Muhamedjan málimdedi.&nbsp;</p>

Onyń aıtýynsha, jyl saıyn medıtsınalyq saqtandyrý esebinen kardıohırýrgııa, neırohırýrgııa, ýrologııa, travmatologııa, onkologııa, hırýrgııa jáne taǵy da basqa profılder boıynsha myńdaǵan operatsııa jasalyp jatyr. Mundaı operatsııalar kúrdeliligine baılanysty emhanalar men ǵylymı ortalyqtar deńgeıinde de jasalýy múmkin.

«Mysaly, 2024 jyly MÁMS arqyly 128 myńnan astam operatsııa jasalyp, oǵan 79,1 mlrd teńge tólengen. Onyń ishinde joǵary tehnologııalardyń kómegimen jasalatyn operatsııalar men manıpýlıatsııalarǵa Qor 14,7 mlrd teńge tóledi. Saqtandyrylmaǵan azamattar osyndaı operatsııalardy jasatatyn bolsa qaltasynan birneshe mıllıon tólegen bolar edi», — dep atap ótti Іlııas Muhamedjan.

2024 jyldyń 9 aıynda Almaty qalasynda 5200 kardıohırýrgııalyq operatsııa, 3300 neırohırýrgııalyq ota, lor-profıli boıynsha 250 operatsııa jasalǵan.

«Sońǵy kezde artroz, artrıt syndy býyn aýrýlarynyń kóbeıýine baılanysty tize, jambas býyndaryn almastyrýshylar sany kúrt artqany belgili. 2024 jyly almatylyq travmatologtar osyndaı 3500 operatsııa jasaǵan. Oǵan MSQ 5,2 mlrd teńge tóledi», — dedi fılıal dırektory.

Eske salaıyq, buǵan deıin MÁMS-ke aılyǵy joǵary qazaqstandyqtardan 250 mlrd teńge túspeı jatqanyn jazǵanbyz.